Apuia telna Mumbai-in Goa sawp

ISL player man to ber Lalengmawia'n a club thar Mumbai City match hmasa berah bul a ṭan a, Indian Super League inkhelah Mumbai club hian 3-0 in FC Goa an sawp.

Season hmasaa FC Goa tana goal 14 khungtu Igor Angulo-a'n Mumbai jersey hain a club hlui a hmachhawn a, Athletic Bilbao striker hlui hian a club hlui lakah zahngaihna a lantir lo - goal hnih a khung.

Kum 37 mi striker goal khung hi minute 33-naa penalty aṭanga lut a ni. Real Madrid youth system chhuak, Goan club defender Ivan Gonzalez chu Serie B club Vila Nova aṭanga Mumbai-in loan-a an hawh Cassio Gabriel lakah a foul a, penalty hi a chawi a ni.

Minute thum hnuah Angulo bawk kan hmu nawn a, Raynier Fernandes ball pek fing tak chu an goal hnihna ni turin a khung. Minute 76-naah Mumbai tan kum 26 mi, Brazilian striker Ygor Catatau chuan goal khat a khung leh a, Mumbai an chak chiang.

FC Goa lamah hian defender beiseiawm Lalhmangaihsanga chuan inkhel bul a ṭan a, Armed Veng South tlangval hi ISL-a a season hmasa bera match hmasa berah centre back-ah dintir a ni a, chhinchhiahtlak a tling.

Zanin ISL-ah Mizo player pariat awmna Odisha FC leh Bengaluru an inkhel dawn. Odisha club-ah hian midfielder Paul Ramfangzauva, defender Lalhrezuala Sailung, forward Isak Vanlalruatfela, striker Daniel Lalhlimpuia, forward Jerry Mawihmingthanga, forward CVL Remtluanga, defender Lalruatthara leh attacking midfielder Isaac Vanmalsawma te an awm a, Bengaluru-ah hian Edmund Lalrindika chu Mizo awmchhun a ni.

Inkhel Result
Mumbai City FC 3 - 0 FC Goa
MUM: Igor Angulo 33' (P), 36'; Ygor Catatau 76'

Zanin Inkhel Tur
Odisha FC 7:30 PM Bengaluru FC