Hmunruak inchuh tur Dortmund leh Sporting

Champions League group C aṭangin Ajax chuan last 16 an lut fel tawh, hmunruak pakhat la awm chu Borussia Dortmund leh Sporting Lisbon ten an inchuh ang - team pahnih hi zanin dar 1:30 hian Jose Alvalade Stadium-ah an inkhel ang.

Match li an khelh tawh aṭangin Dortmund leh Sporting hian point ruk ve ve an hmu, an intawn hmasaka hnehna changtu Dortmund hi pahnihnaah an awm mek; an point hmuh zat a intluk miau avangin zanin inkhel tur hi a pawimawh hle.

Dortmund beiseina
Khualmuala inkhel tur ni mah se Borussia Dortmund midfielder Julian Brandt chuan tlang tura beisei an neih thu a sawi a, tun hnaia an khelh dan thlirin Portuguese club chu an luhchhuah theih ngei a ring.

Dortmund hian kartawp Bundesliga inkhelah VfB Stuttgart chu 2-1 in an hneh a, league hmahruaitu leh champion lai ni bawk Bayern Munich an phak lohna chu point khat chauh a nih avangin season an hmang ṭha rih hle.

Julian Brandt chuan, "League lama result ṭha neih hi a pawimawh, kan result ṭha vang khan Champions League lamah pawh inrintawkna sang tak nen kan feh chhuak thei ang. Sporting hi team ṭha tak ni mah se kan hneh theih ngei ka ring," a ti.

Dortmund hian hliam vangin Erling Haaland an la chhawr thei dawn lo a, defender pawimawh Mats Hummels chu hram a ni bawk. Captain Marco Reus chungah mawhphurhna sang leh kawp ang - Jude Bellingham chu danglamna siam thei tur a ni bawk.

Chak a ngai
Sporting tan tun ṭumah hian chak loh a thiang dawn lo. An intawn hmasakah an tlawm a, an chak lohna 1-0 aia tama an hneh let thei a nih erawh chuan pahnihna an ni thei dawn - Portuguese club tan inhnehtawk pawh a thiang dawn lo.

An inhnehtawk a nih chuan Dortmund hi tlang chiang tluk an ni ang - Sporting hian an match hnuhnung berah group hmahruaitu Ajax chu Amsterdam-ah an hmachhawn dawn a, an elpui chetsual an ngaihchan tel a ngai bawk; an tan zaninah chak ngei ngei a ngai.

Ruben Amorim-a enkawl Sporting hi tun hnai an khelh dan thlir chuan beisei nei ngam tur an ni. League-ah pahnihna ni mah se hmahruaitu Porto nen point 29 ve ve an nei, inelna hrang hrang an match hnuhnung pangaah an chak vek avangin inrintawkna an nei sang ve khawp ang.

Kum 36 mi Amorim chuan, "Rinna leh beiseina kan neih chuan tih theih loh a awm lo, ka naute hi tawnhriat nei ṭha leh rawlthar rual inchawlhpawlh an ni a, kan tum ram thleng turin theihna kan nei," tiin an inrintawk thu a sawi ve bawk.