Muguruza-i'n hma a sawn zel

Garbine Muguruza chuan tun hma lama a ropui tawhna ang neih let ngei a tum a, tunah chuan Women's Tennis Association (WTA) ranking chhuak thar berah pawh hma a sawn leh ta - pathumna dinhmun luahin a chungah player pahnih chiah an awm.

Spanish nulain tennis hmanga khawvel a rawn barakhaih hmasak khan kum 21 mi chauh a la ni a, tunah chuan 28 mi lai a lo ni ve tawh. French Open leh Wimbledon champion hlui hian season a hmang ṭha.

WTA Finals khelh zawh takah pawh khan Muguruza hi a champion, player langsar dangten kum harsa tak an hman laiin atan erawh thawhlehna kum tia sawi theih a ni, a sang zual 10 zinga tel phak tawh meuh lo kha tunah chuan a ṭha berte zinga mi a ni leh tawh.

Ranking chung berah Ashleigh Barty a la awm chhunzawm. Australian nula hian hripui leng vangin nikum leh kuminah inelna a hmachhawn tam lo, mahse ranking point a lo hmu hnem fal tawh - kuminah Wimbledon title a lak leh bawk avangin kum tluanin a chung berah a awm.