Southgate-a'n contract thar a ziak

England manager Gareth Southgate chuan December 2024 thleng Three Lions enkawl turin contract thar a ziak a, nakkum World Cup thlenga contract a neihlai chu a pawtsei.

Southgate chuan, "He team enkawl theih hi inchhuanna tham a ni a, kan hmaah hian chona phurawm tak a inchhawp a ni," a ti a, ani bakah hian assistant manager Steve Holland chuan December 2024 thleng atan contract a ziak ve bawk.

Contract thar ang chuan Southgate hian nakkum World Cup bakah Euro 2024 thleng chu Three Lions a kaihruai thei dawn tihna a ni a, a team khelh dan phung avangin fans tam takin ngaina lo mah se result a neih miau avangin Football Association-in a chungah rinna an nghat.

Southgate kaihhruaina hnuaiah England hian Euro 2020 final an lut a, kum 55 hnua England-in major tournament-a result an neih ṭhat ber ṭum a ni.

Kum 2016 aṭanga England kaihruaitu chuan, "He hun hi rim taka thawk player-te leh staff te chunga lawmthu sawina hun atan hman ka duh a, anni mai bakah fan-te pawh kan hma hun atan an phur hle tih ka hria," a ti.

Southgate hian September 2016 khan England hi coach lailawk ni chungin a enkawl phawt a, thamna sum vanga ban tak Sam Allardyce hmun ruak a luah. Result a neih ṭhat avangin thla hnih hnuah a nghet atan lakluh a ni a, Three Lions hian an la tisual lo niin a lang.

Kum 2018 khan kum 28 hnua a vawi khat nan England chu World Cup semifinal a hruai thleng a, UEFA Nations League-ah pathumna an ni a, Euro final-ah Italy an ngam lo bawk.

Southgate chuan, "Football khawvela match hautak ber ber pawlah tun hnai khan team ka kaihruai a, kha dinhmun thleng tur khan kawng awlsam a awm lo.

"Team ṭha tak nei a, ṭha taka thawhho chuan beiseina a sang duh hle. Major tournament champion harsatzia chu World Cup nomawi pakhat chiah kan neih hian a hrilhfiah. Mahse, beiseina kan neih tlat a ngai a, world champion nih hi kan tum ber chu a ni," a ti.

Southgate hian England hi match 68 a enkawlah vawi 44 chu hnehna a chanpui a, vawi 14 an tlawm a, vawi 10 chu draw result an nei a ni.

English coach chuan, "England hian fan, player, Under 21 manager leh senior team manager ka nihna angin ka nunah hmun pawimawh tak a chang a, tournament leh match pawimawh tak takte hi min tiphurtu a ni ṭhin a, ka team hian hmasawn an duh a, hma an sawn zel pawh ka ring.

"Kan hmaah thil phurawm tak a awm a, chutihlai chuan kal bo ta ila, inthiam lohna ka rilruah a awm reng dawn - kan hmachhawpahte beiseina ka neih avangin contract thar ka ziak thei hi ka lawm a ni," a ti.

Southgate hian England-ah hian kum khatah pound maktaduai thum a hlawh mek nia sawi a ni a, contract tharah hian pound maktaduai 5-6 inkar chu hlawh tura ngaih a ni.