Danilo a chawl rei dawn

Juventus defender Danilo chu malpui hliam vangin a inkhel thei dawn rih lo, tuna a lan dan chuan kar riat chhung vel a chawlh a ngai dawn - nakkum tir lamah pawh a la inkhel thei dawn lo tihna a ni.

Brazil international Danilo hi season kal laiah Juventus tan rinrawl a ni a, Serie A bikah phei chuan match 10 khelin Champions League-ah pawh match khat chauh a khel lo, a hliam hi Turin club tan chuan channa lian tak a ni dawn.

Italian club ṭha Juve chuan thuchhuah siamin, "Kar tawpa Lazio nen Rome khawpuia match kan khelh ṭum khan Danilo hi a inhliam, a lan dan chuan kar riat chhung tal a chawlh a ngai dawn a ni," an ti.

Danilo hian a tlem berah pawh match 12 vel a khel thei dawn lo. Nizan khan Chelsea a hmachhawn thei lo, UCL match hmabakah Malmo a khel thei dawn lo bawk - league lamah Atalanta, Napoli leh AS Roma te chu a hmachhawn loh tur langsar an ni ang.