A vawi khat nan LeBron James an hrem

LeBron James chu NBA match khat khel thei lo tura hrem a ni. Kum 36 mi James hian basketball inelna sang ber hun rei tak a khel tawh chungin, inkhel thei lo tura hremna a hmachhawn hmasak ber ṭum a ni hial.

Los Angeles Lakers leh Detroit Pistons inkhelh ṭumin James leh Isaiah Stewart te an inti buai a, an pahnih hian hnawh chhuah (eject) an ni. James bik hi basketball a khelh hun chhunga vawi hnih an hnawh chhuahna chiah a ni bawk.

Lakers star James chuan, "Inkhel entu zawng zawngin ka ti lui lo tih an hria," tiin rebound an inchuhna lama Pistons nen an inbakkaih chu tih luih a nih loh thu a sawi chhuak a, a teammate Anthony Davis pawhin James chuan a tih luih a nih loh thu a sawi ve bawk a ni.

Nimin zingah NBA khelh chhunzawm leh niin, champion lai Milwaukee Bucks chuan Orlando Magic 123-92 in an hneh. Bucks hian chawlhlawk laiin point 41 zetin hma an hruai fal hman, hei hi a club record thar a ni nghal.

Inkhel dangah Brooklyn Nets chuan Cleveland Cavaliers chu 117-112 in an hneh. Nets tan hian Kevin Durant chuan point 27 a nei, a point neih zingah hian quarter lina an khelh laiin an hmahruaina basket a lut a, inkhel inhnehtawk taka hnehna an chan theih chhan a ni.

Nets hian season hmasa khan Durant leh James Harden te bakah Kyrie Irving te an nei a, champion tura rinkai ni mah se beisei an phak lo. Kuminah Irving hi hri danna lak loh vangin an chhawr thei rih lo, an duhthusamin season bul an ṭan thei rih leh ta lo a ni.

NBA regular season kal laiah Nets hian vawi 13 hnehna an chang tawh a, ṭum nga an tlawm tawh thung. Eastern Conference lamah hmahruaitu an mek.

NBA Results
Milwaukee Bucks 123 - 92 Orlando Magic
Brooklyn Nets 117 - 112 Cleveland Cavaliers
Phoenix Suns 115 - 111 San Antonio Spurs
Memphis Grizzlies 119 - 118 Utah Jazz
Philadelphia 76ers 102 - 94 Los Angeles Kings