Chennaiyin an chak nghal

Lallianzuala Chhangte hoa inlan Chennaiyin FC chuan Indian Super League-a an match hmasa berah hnehna an chang nghal a, Hyderabad FC chu Vladimir Koman-a penalty hmangin 1-0 in an hneh.

Minute 66-naah Chennaiyin captain Anirudh Thapa lakah Hitesh Sharma a foul a, penalty a chawi. Penalty pet turin Hungary tana vawi 36 inlana goal sarih khung thei Vladimir Koman a lo pen chhuak a, Sampdoria attacking midfielder hlui hian ISL-a a match hmasa berah goal a khung nghal.

Chennaiyin tan Lallianzuala'n inkhel bul a ṭan a, Lunglei tlangval hian goal khung lo mah se Hyderabad tlarhnung tan a hnawksak - minute 58-naa a chance neih ṭhat Hyderabad keeper Laxmikanth Kattimani-a'n ṭha zeta a dansak chu uiawm tak a ni.

Hyderabad-in Mizo keeper Lalbiakhlua Jongte leh midfielder Mark Zothanpuia kawl mah se player beiseiawm pahnih hi squad-ah telh an ni lo a, Chennaiyin lamah Jerry Lalrinzuala chuan bench lamah hun a hmang tluan bawk.

Zanin dar 7:30-ah ISL inkhel pakhat a awm dawn a, NorthEast United leh Kerala Blasters an inkhel ang - team pahnih hi an match hmasa berah 4-2 ve vein an tlawm.

Aizawl FC coach hlui Khalid Jamil-a enkawl Highlander-ah hian Joe Zoherliana, Laldanmawia Ralte, Lalkhawpuimawia, Rochharzela, William Lalnunfela leh Emanuel Lalchhanchhuaha te chu Mizo player awm an ni a, Ema hi hliam vangin tun season a inlan a rinawm tawh lo thung.

Blasters-in K. Lalṭhathanga chu Mizo player an kawl chhun a ni a, an match hmasa berah Mohun Bagan chu 2-1 in an ngam lo. NorthEast United-in 4-2 vekin Bengaluru an ngam lo bawk a, team pahnihin zaninah chak an tum ve ve ang.