Spain-ah Man United-in Villarreal an hneh

Manchester United-in Champions League last 16 lut turin Thawhlehni zan khan an elpui Villarreal 2-0 in an hneh.

Group F inkhel dangah Atalanta leh Young Boys te 3-3 a inhnehtawk avangin match khat khelh hmabak nei chungin English club hi hmahruaitu an ni.

Ole Gunnar Solskjaer an ban hnuah Michael Carrick hoin Man United an feh chhuak. El Madrigal-ah Cristiano Ronaldo-a'n goal hmahruai khungin Jadon Sancho-a'n English club tana a goal hmasa ber a khung. Carrick chuan an hnehna chan hi Solskjaer tan a hlan.

Hei le, Carrick

Manager nei lo Man United hi Michael Carrick hnuaiah an khel a, manager tur an zawng mek. Carrick hian thutlukna huaisen a siam a, Ole hnuaia khawih chet thiang loa ngaih Bruno Fernandes chu bench-ah a dah.

Portuguese midfielder aiah hian Donny van de Beek-a'n inkhel bul a ṭan a, Dutch midfielder hian number 10 role chelhin Cristiano Ronaldo, Sancho leh Anthony Martial ten an hual.

Norwegian manager ang thoin Carrick-a'n Fred leh Scott McTominay te tlarhnung pui turin a dah a, tlarhnungah Luke Shaw inhliam vangin Alex Telles a lut.

Defence laiah Harry Maguire leh Victor Lindelof te inkawpin Aaron Wan-Bissaka-a'n right back hna a chelh.

Chhandamtu De Gea

Man United tan point khat hlawh chhuah a pawimawh a, tlarhnung uluk taka an rem chungin player-ten inrintawkna an nei lo. Thlen hman loh chiah chiah an ngah a, team angin pressure an pe dik thei lo a, chutih rualin Watford an hneh loh ṭum ang em em chuan an buai lo.

Spanish keeper David de Gea-a'n Man United a chhanhim a, goal la luh hmain first half leh second half-ah Manu Trigueros goal khung tur ṭha takin a dang ve ve. Yeremi Pino leh Arnaut Danjuma ten chance ṭha an hlah bawk. Mualneitu Villarreal an khel ṭha zawk a, Spanish club hi minute 70 chhung an chungnung zawk.

Substitution awmze nei

Carrick-a'n minute 66-naah Fernandes leh Marcus Rashford chu VDB leh Martial aiah a luhtir a, substitute pahnih hian inkhel an thlak.

Nipui bazara manto taka Man United lakluh Sancho-a'n a theihna tak a pholang a, Villarreal tlarhnung a chhaih buai.

Mikhual team an vannei tel a, minute 78-naah keeper Geronimo Rulli pass fuh tawk loh chu Etienne Capoue-a'n a chan hmain Fred-a'n a tibuai a, hemi per hi Ronaldo-a'n keeper pet khumin goal-ah a chantir.

Man United-in inringtawkna an nei a, an inkhel a hmuhnawm. Minute 90-naah counter attack mawi tak an pholang a, Fred leh Ronaldo-te aṭanga inṭanin Rashford-a'n Fernandes a pe a, Sancho-a'n Portuguese midfielder hnen aṭanga a ball hmuh chu kawh zetin a pet goal.

Engtin zel?

Man United hian kartawpah Chelsea an hmachhawn dawn a, manager thar tur an la zawng zel. English club hian manager nghet tur ni loin manager lailawk tur an zawng niin sawi a ni. Heti chung hian Mauricio Pochettino an la thei a nih chuan manager nghet atan an duha ngaih a ni.

Argentine manager hi PSG-ah nghet a nih chuan manager lailawk tur an lak zawk a rinawm a, manager lailawk tura sawi rik zingah Barcelona manager hlui Ernesto Valverde leh Lyon manager hlui Rudi Garcia te hming a la ring.

Ole an ban tirha manager hming ri ring Zinedine Zidane leh Ajax manager Erik ten Hag te chu tun dinhmunah chuan an lalut lo turah a ngaih theih a, chutih rualin thu chiang awm hma chuan thil thleng thei lo tawp a awm lo.