Lakers an che fuh thei rih lo

Los Angeles Lakers chu New York Knicks lakah 106-100 in an tlawm leh ta. Lakers hi NBA regular season kal laiah vawi 10 zet an tlawm ta, an chak zat (9) aiin an tlawmna zat a tam tihna a ni. Team ṭha tan chuan kum bul ṭan dan duhawm lo tak a ni ngei ang.

LeBron James chu hrem vangin a inlan thei lo a, Russell Westbrook-a'n point 31 neiin Anthony Davis pawhin point 20 chu nei ve bawk mah se hnehna chan nan a tawk zo lo.

Knicks tana point nei hnem ber chu Evan Fournier (26) a ni a, a fal lem lo. Mahse, ani bakah hian player dang panga ngawtin point 10 chuang an neih thei vek a, mimal ni loin team thawhhona ṭha chu an chak chhan a ni.

Nimin zing inkhel dangah Dallas Mavericks chuan Los Angeles Clippers nen over time an khelh hnuah 112-104 in hnehna an chang. Miami Heat pawh dinhmun hniama an din zet hnuah Detroit Pistons lakah 100-92 in an chak; Portland Trail Blazers pawhin 119-100 in Denver Nuggets an hneh ve bawk.