Second round-ah Sindhu a lut

Olympic medal vawi hnih la tawh PV Sindhu chu nimin khan Indonesia Open Super 1000-ah a inlan a, a match hmasa berah Aya Ohori nen inkhel tawk viau mah se game thum an khelh hnuah hnehna a chang.

A tir lamah Sindhu hi a che ṭha tawk lo, game hmasa ber pawh a hloh. Darkar khat leh minute 10 an inkhelh hnuah 17-21, 21-17, 21-17 a hnehna changin last 16 a inhlangkai; Japanese star nen vawi 11 an intawn tawhah a la chak vek tihna a ni.

World number 7 Sindhu-i'n kar hmasa khan tournament a khel tawh bawk a, semifinal a paltlang zo lo. Tun ṭuma a match hnihna atan chuan German shuttler Yvonne Li a hmachhawn leh ang.

Indian player dang, mixed double huanga inlan N Sikki Redd leh Dhruv Kapila te erawh an tlawm, an match hmasa berah Japanese duo Kyohei Yamashita leh Naru Shinoya te ṭangdun chu 7-21, 12-21 in an hneh lo.