Barcelona hmalam hun an kutah a awm

Thawhlehni zan Champions League inkhelah Barcelona leh Benfica te goal awm loin Nou Camp-ah an inhnehtawk. Xavi kaihhruai Catalan club hian pahnihna dinhmun hauhin an hmalam hun an kutah awm mah se an hnuaia awm Benfica aiin an dinhmun a thlanawm chuang lo.

Group E inkhel dangah hmahruaitu leh knockout stage lut tawh Bayern Munich-in vur tla hnuaiah mualneitu Dinamo Kiev 2-1 in an hneh a, German champion hi match nga an khelh tawhah an chak vek.

Xavi XI

Barcelona-in Xavi hnuaia an match hmasa a berah Espanyol 1-0 in an hneh a, 4-3-3 formation an hmang. Catalan club manager Xavi hian Benfica an hmachhawn ṭumin 3-4-2-1 a rawn hmang thung a, khingpuite milin game plan a siamah a ngaih theih.

Xavi hian player pawh a siksawi a, tlarhnungah Gerrard Pique bula ding turin Eric Garcia leh Óscar Mingueza te aiah Ronald Araújo leh Clément Lenglet te a thlang zawk. Mual sir aṭanga nawr turin kum 18 mi Yusuf Demir leh Jordi Alba te a thlang.

Midfield-ah rinrawl Sergio Busquets leh Frenkie de Jong te an inkawp a, tlarhmaah Memphis Depay a maltlat. Dutch forward thlawp tur hian kum 19 mi Nico Gonzalez leh kum 17 mi Gavi te an awm.

Xavi kut hnu

Ronaldo Koeman-a'n player-in an zir loh avangin passing game a khelh theih loh niin a sawi a, khelh dan thar a ṭul thu a sawi. Amaherawhchu Xavi erawhin player lakbelh chu sawi loh, player langsar ṭhenkhat Ansu Fati, Martin Braithwaite, Pedri leh Sergio Aguero te tel loin passing game a khel thei tlat.

Estádio da Luz-a an inkhelh ṭum khan Barca-in goal thum an chhuah a, chutihrualin ball erawh a in pass tam tho. Vawi 524 an in pass a, ball possession pawh 60% an nei. Xavi hnuaiah hma an sawn a, Nou Camp-ah ball possession pawh 66% neiin vawi 644 zet an in pass a, statistics aṭang pawhin hma an sawn tih a lang.

Inkhel chu

Barcelona hian goal chance pawh an insiam hnem. Nico González-a'n chance ṭha a nei nghal a, Depay-a'n Benfica tlarhnung a rum ṭhaih a, Benfica keeper Odysseas Vlachodimos-a'n ṭha zetin Gavi ball pet a dang. Xavi hnuaiah hma an sawn.

Chutihrualin insiamṭhat zel an mamawh tih a lang a, Benfica tana Roman Yaremchuk ball tauh chu Andre Ter Stegen-a'n a dang ṭha hle. Nicolás Otamendi pawhin ṭha zetin goal a khung a, Argentine defender pass-tu a offside vangin pawm a ni lo.

Barca tlarhmaa awmten chance an nei kim a, Demir-a'n box chhung chiah aṭangin a ke vei lamin mawi zetin a hlai a, goal ban a per. First half-ah goal a lut lo a, second half-ah danglam lo mah se goal chance ṭha erawh a tam.

Dutch forward Depay-a'n ṭha taka a lakluh hnuah a duh tui hret a, Otamendi-a'n a ti buai hman. Bench aṭangin Ousmane Dembélé a rawn lut a, French winger hi mual dinglamah hmuhnawmin chance ṭha ṭum hnih a rawn siam.

Minute 83-naah Alaba cross chu Araujo-a'n goal-ah a chantir a, nasa takin lawm chiam mah se offside vangin pawm a ni lo. Injury time-ah Pique-a'n corner aṭanga a chance ṭha chu a tauh out.

Minute 90 thlirin Barca vanduai zawk angin lang mah se hun tawp hma hretin Benfica-in chance ṭha bik an hlah. Benfica forward Darwin Nunez leh Seferovic ten Barca defender pakhat chauh an hmachhawn a, Swiss forward Haris Seferovic-a'n Barca keeper Ter Stegen a patlang hnuah goal zawnah a pet lo.

Barca dinhmun

Champions League-ah head to head en tur a ni a, Barca hian khualmualah Benfica hi 3-0 a an hneh loh avangin an point hmuh zat a inang a nih chuan Portuguese club hi an dinhmun a ṭha zawk dawn. Xavi hote hian club dang result-a innghat lo turin Allianz Arena-ah Bayern Munich an hneh a ṭul dawn a, a harsa dawn. Benfica erawhin team nem ber Dinamo Kiev an hmachhawn dawn avangin pathumnaa awm chungin an dinhmun a ṭha letling.

Xavi chuan, "Khualmuala Bayern hneh hi thil theih a ni. Kan huaisenna leh thiamna kan pholan ngam a ṭul dawn a, group stage paltlang turin kan theihna zawng zawng kan chhuah a ṭul," tiin knockout stage an luh theih thu a sawi a, Benfica-in draw game an khelh thu a sawi tel bawk.

Barcelona khingpui tur Bayern Munich hian vur tla hnuaiah Dinamo Kiev 2-1 in an hneh a, Robert Lewandowski leh Kingsley Coman ten goal an khung. Polish striker Lewy goal khung hi goal mawi bik a ni a, box chhunga ball per chu mawi zetin a back volley lut.