Vawiin aṭangin India Vs New Zealand

ICC World Test Championship final hmasa bera inhmachhawn India leh New Zealand ten vawiin chawhma dar 9:30 aṭang hian Test match vawi hnih an khelh tura a hmasa zawk chu Green Park International Stadium, Kanpur-ah an khel dawn.

Test final an khelh ṭumah New Zealand-in hnehna an chang a, chutihrualin tun ṭuma an khelhna tur erawh India a nih dawn avangin Men in Blue dinhmun a ṭha zawkah a ngaih theih.

India hian captain Virat Kohli leh opener Rohit Sharma te an awltir a, Ajinkya Rahane captain-na hnuaiah an khel ang. Opener KL Rahul pawh inhliam vangin Test match pahnihah a tel thei dawn lo a, Shreyas Iyer emaw Suryakumar Yadav emaw tan hun ṭha a nih theih a rinawm.

Test match khelh hma hian T20 series khelh a ni a, India hian 3-0 in hnehna an chang. T20-ah hian Kane Williamson hahchawlhtir a ni a, Test match khelh turah hian Black Caps captain hi a rawn inlan leh tawh ang.