Manipur lakah Mizoram chak lo

Board of Control for Cricket in India (BCCI) hnuaia inelna neih lai Mens U25 State A Trophy 2021-22 ah nimin khan Mizoram an chak lo. Mizoram hi an khingpui Manipur lakah run 62-in an chak lo a ni.

ACA Stadium, Guwahati-a inkhelah Mizoram hi ṭhum vawra vannei zawk niin vawm hmasak an thlang. Vanlalremruata'n wicket thum lain Lalhriatrenga chuan wicket hnih a la bawk - Manipur hi over 37 chhungin an vawm thi vek, run 135 chauh an siam.

Mizoram tan target sang tak niin a lang lo, umphak theih mai pawh a rinawm. Mahse, Mizoram lamin run siam an harsat takzet a, over 42 chhunga run 73 chauh siamin an thi kim - match hmasa lama an khelh dan an phak lo viau.

Mizoram team manager Laithanzuala chuan, "Kan top order-te an che fuh lo a, theih tawp chhuah mah ila kan tho chhuak leh thei ta lo. Kan bowler-te erawh an che ṭha," tiin Vanglaini a hrilh.

Plate group-ah Mizoram hian match li an khelh aṭangin point riat an hmu, team pasarih inel zingah pangana an ni mek. An group match hnuhnung ber atan Zirtawpniah Meghalaya an hmachhawn leh ang. Inelnaah hian state pawn mi lak phal a ni lo a, tualchhung player hlanga khelh a ni.