Dan rual lohin Chelsea an hrang

Champions League champion lai Chelsea chu dan theih an ni lo. Blues hian an mikhual Juventus chu 4-0 tehmeuhin an sawp a, mikhual Old Lady hian European football inelna sang ber huanga an chak loh chian ber ṭum an tawng.

Blues tan Trevoh Chalobah, Reece James, Callum Hudson-Odoi leh Timo Werner ten goal khat ṭheuh an khung. Thomas Tuchel-a naute hian point 12 hmuin group H hmahruaitu an ni a, an match hnuhnung berah Zenit St Petersburg an lenchilh leh dawn a ni.

Thawhlehni zan group H inkhel dangah Malmo leh Zenit St Petersburg te chu 1-1 in an inhnehtawk, team pahnih hi last 16 luh beiseina nei tawh lo an ni a, an inkhel hian kawngro a su tawh lem lo.

A goal hnem

Club pahnihte hi Turin khawpuia an inkhelh ṭum chuan Juventus lamin 1-0 in hnehna an chang a, goal awmchhun hi Federico Chiesa khung a ni. An intawn vawi hnihnaah erawh Chiesa-a'n target zawna vawi khat a pet bak chu tih theih an nei tam lo.

Stamford Bridge a nih tawh avangin a boruak a danglam. London khawpui boruak vawt surh mai te chu Chelsea tana goal khung ti nuamtu mai a ni a, minute 25-naah Chalobah hmangin an khung ṭan nghal.

Season duhawm hmangtu Reece James-a'n keeper Wojciech Szczesny dan theih loha a khung bakah, Juve lam fimkhur tawk loh chhawrtu Hudson-Odoi chuan an goal thumna a khung, Juve midfielder Weston McKennie tihsual vangin Hakim Ziyech-a'n Werner tan a siamsak bawk.

Blues an ṭha tawk

Chelsea hian team ṭha Juventus lakah 73% ball possession an nei thei a, shot vawi 16 ngawt an nei thei. Italian club tana Alvaro Morata goal khung ve tur pawh defender tawnhriat ngah Thiago Silva chuan goalline a pelh hmain a bin chhuak hman.

Tuchel-a'n Chelsea hi match 50 a kaihruai ta, hemi hun chhung hian ṭum 35 hnehna an chang thei - goal 24 chiah an chhuah zui; British club enkawl tawh zingah a tir lam match 50 chhunga goal chhuah tlem ber an ni.

German manager fing tak Tuchel chuan, "Turin-ah kha chuan risk kan la ngam lo a, kan tisual. Tunah chuan engkim kha ruahman ang vekin a kal, ka naute kha ball an chan loh lai pawhin an tlan taima hle, result hi chu duhthusama ṭha a ni," tiin a sawi.

Lawm a kim lo

Romelu Lukaku a dam tawh a, khelmual chhunga James, Hudson-Odoi leh Silva te chet dan a hmuhnawm fal. Hakim Ziyech leh Ruben Loftus-Cheek te khelh dan pawh manager tana lawmna tur a ni. Mahse, thu lawmawm lo chu Ben Chilwell leh midfielder N'Golo Kante te an hliam.

Tuchel chuan, "Ben leh N'Golo te khup a hliam, an dinhmun tak la hre lo mah ila na tak an nih loh hram ka beisei," a ti. Blues player pawimawh pahnih hi inkhel bul ṭantu ni mah se an hliam vang hian thlak an ngai ve ve.

Premier League hmahruaitu Chelsea hian Pathianni zan dar 10:00-ah Manchester United an mikhual zui dawn a, league match pawimawh an khelh zui dawn avangin player pahnih inhliam hi a na viau a nih chuan a pawi thei.

Mualphona

Max Allegri chu a naute khelh danah a lawm lo, hun chanve hma lamah khel ṭha thawkhat viau mah se second half an hman dan chu mualpho thlak a tih thu a sawi. Kum 2004 khan AS Roma 4-0 bawkin an ngam lo a, an chak loh chian record hi an nih rual leh chiah.

Italian manager Allegri chuan, "Chelsea khan minute 90 chhung chu na takin min nawr reng. Kan inveng thei viau a, remchang pawh kan insiam ve thei. Mahse, kan goal hnihna leh goal thumna luh dan kha chu kan fimkhur loh vang a ni," tiin a sawi.

Juventus hian last 16 chu an lut chiang tho. Mahse, group hmahruaitu ni tur chuan Chelsea chetsual an chan tel a nga tawh dawn. An match hnuhnung ber atan point khat chauh la nei leh group mawngphah ni bawk Malmo an mikhual ve leh ang.