Aizawl FC-ah Willis Plaza leh Dipanda Dicka

NorthEast aṭanga I League champion thei awmchhun Aizawl FC chuan champion ngei tumin squad an din a, player lak thar zingah striker ṭha pahnih Willis Plaza leh Aser Pierrick Dipanda te an tel.

India rama football inelna sang ber dawttu I League hi December 26 aṭanga khelh ṭan tura ruahmanna a ni a, Covid-19 vangin Kolakata-ah khelh a ni dawn. Mizo club hian October thla aṭang khan RG Stadium, Mualpuiah training an nei ṭan tawh a ni.

Mangṭha Alfred
I League champion ṭuma Aizawl FC captain Alfred Kemah Jaryan chu visa fel theih loh avangin Mizo club tan a khel thei dawn lo. Liberian midfielder hian kum 2015 aṭang khan Aizawl FC tan a khel ṭan a, I League-a Mizo club champion ṭum khan best midfielder-ah an thlang.

Mizoram Premier League-ah Aizawl FC hi vawi li an champion tawh a, Alfred hi champion hmasa berah tel lo mah se a hnuhnung pathumah a tel vek. Alfred bakah hian Argentine midfielder Matias Veron chu visa a fel thei lo a, club nena inhriatthiamna nen contract tihtawp a ni.

Hello Willis & Dicka
Aizawl FC-in Alfred leh Veron te chhawr thei lo mah se chanchin thar duhawm hriat tur a awm a, I League-a striker ṭha ber zinga mi Willis Plaza leh Aser Pierrick Dipanda te an lalut.

Kum 34 mi Willis Plaza hi I League-a player hmuhnawm ber zinga mi a ni a, Trinidad and Tobago tan ṭum 23 khel tawhin goal sarih a khungsak. Trinidadian forward hi a theihna angin a khel chhuak ṭhin a, East Bengal, Mohammedan leh Churchill Brothers ṭantute chuan a thiamzia an hrechiang ang.

Willis Plaza hian 2018–19 season khan Churchill tan khelin goal 21 khungin top scorer a ni a, Aizawl FC tan pawh goal khung nual turah a ngaih theih. Aser Pierrick Dipanda hi Valencia B team tan pawha khel tawh a ni a, India ram football-ah pawh a mikhual lo hle.

Cameroonian forward hi DSK Shivajians FC, Shillong Lajong, Mohammedan leh Mohun Bagan tan te a khel tawh a, Willis Plaza nen tlarhmaa an inkawp dawn avangin Mizo club hi champion rinkai zingah a sawi theih ang.

Player ṭha dang
Aizawl FC hian tlarhnung ti phui turin Uzbekistan centre back Karimov Olimjon an lalut tawh a, Churchill Brothers captain Bazie Armand nen a thu phungin inremna an nei tawh bawk.

Kum 29 mi Bazie Armand hi an lalut thei a nih chuan Alfred-a thlakna turah a ngaih theih ang. Feet ruk leh inches khata sang Bazie hi defensive midfielder a ni a, Mizo club mamawh tak turah a ngaih theih.

Foreigners bakah hian Indian players pawh an la tel. Kumin Durand Cup-a Delhi FC tana khel ṭha tak - Rinreithan Shaiza leh AIFF buatsaih futsal inelnaa top scorer leh best player ni kawp thei Nikhil Mali te chu loan hmangin an lalut.

Mizo player ṭha
Aizawl FC hian Mizo player ṭha pawh an rut tel a, ISL club Odhisa FC-a khelhna hmun chang lo Samuel Lalmuanpuia chuan loan hmangin Mizo club tan a khel dawn. Mizo forward talent nei ṭha ber zinga mi Samuel-a hian Aizawl FC-ah a hming a chher ṭhat leh a ṭul ang.

Mizo club hian Pune City tana khel tawh Hnathial winger Jakob Vanlalhlimpuia an la a, Odhisa FC aṭangin loan hmangin full back Jones Lalṭhakima an la. Mizoram Police aṭangin midfielder tawnhriat nei ṭha R. Malsawmtluanga leh Lalhmunmawia (Ahmuntea) te an la bawk.

Aizawl FC hi season hnuhnung bera enkawltu Yan Cheng Law hoin an khel leh dawn a, coaching staff-ah kum 28 mi Law hian Mohammedan leh Delhi FC te a enkawl tawh a ni.

I League khel tur club-te
1 Aizawl FC
2 Chennai City
3 Churchill Brothers
4 Gokulam Kerala
5 Indian Arrows
6 Mohammedan
7 Neroca
8 Punjab
9 Rajasthan United
10 Real Kashmir
11 Sreenidi Deccan
12 Sudeva Delhi
13 Trau

• Rajasthan United hi 2021 I-League Qualifiers champion an ni.
• Sreenidi Deccan hi inlei tling an ni a, tun season-ah an relegate thei lo.
• AIFF-in rawlthar ṭha rual a dah khawmna Indian Arrows hi an relegate thei lo bawk.
• Season liam taa relegate chu Neroca an ni a, amaherawhchu AIFF-in Covid-19 hri leng vangin Manipur club chungchangah zahngaihna lantirin I League-ah an awm chhunzawm ang.
• Covid-19 vangin kumin I League hi home leh away hmanga khel loin Kolkata-ah khelh a ni ang.
• Team 13 hi vawi khat ṭheuh an inkhel kual ang a, chumi zawh chuan a sang pasarihin Championship stage an khel ang. A hniam parukin Relegation stage an khel thung ang.