City lakah Messi leh a ṭhiante an tlawm
Paris Saint Germain-in khawvela tlarhma inremfuh ber pawla chhal ngam Lionel Messi, Kylian Mbappe leh Neymar te inkawptir thei mah se Manchester City laka chak nan a tawk zo lo a, an mikhualna ramah 2-1 in an tlawm.
PSG tan Mbappe chuan minute 50-naah goal hmahruai khungin mikhual tlangnel zia a chhuah a, mahse, City-in Raheem Sterling leh Gabriel Jesus hmanga chhangletin an mikhual team lakah an chak daih.
Group A inkhel dangah RB Leipzig-in 5-0 ngawtin Club Brugge an sawp a, Christopher Nkunku leh Emil Forsberg ten goal hnih ve ve an khung a, Andre Silva chuan goal khat a thawh ve bawk- Forsberg goal khat hi penalty aṭanga lut a ni.
Leipzig chak avangin PSG tan hlauhthawn tur a awm ta lo a, Manchester khawpuiah tlawm mah se City nen last 16 an lut chiang tawh. Chutihrual chuan PSG hian an match tawp berah Club Brugge hnehin, City hi Leipzig lakah tlawm pawh ni se group hmahruaitu nih an beisei thei tawh lo a, last 16-ah an fixture a hautak thei dawn tihna a ni.
City an ṭha
Manchester khawpuiah City an ṭha zawk a, tlarhmaah player nei ṭha lo zawk angin lang mah se an goal nawr a na zawk - Rodri chance chu Presnel Kimpembe-a'n a lo tauh hman a, Riyad Mahrez shot chu Achraf Hakimi chuan a lo dang hman bawk.
John Stones chetsual zarah Mbappe chuan chance duhawm nei mah se a hlah a, minute 50-naah erawh French striker a chesual nawn lo - Etihad Stadium ngawihtir turin goal hmahruai a khung a, khel ṭha zawk City an hawihai.
Mahse, Pep Guardiola enkawl team danglamna a lang a, goal chhuah mah se City an chiai duh lo. An nawr ngaiin an nawr reng a, tlarhnung an rem phui viau bawk - Sterling chuan minute 13 hnuah si phurh sutna goal a rawn khung a, English forward hian hralh mai chi a ni lo tih Pep a hmuhtir.
City-in an la duhtawk lo cheu. Sergio Aguero an chân hnu pawha Pep-a'n striker dang a lei loh chhan pholangin Jesus chuan minute 76-naah an goal hnihna a rawn khung a, goal dang lut loin City an chak.
Khawiah nge Messi?
Khawvela footballer ṭha ber anga ngaitu tam tak a nei miau a, Messi-a'n ngaihven a hlawh lo thei lo. Mahse, Argentine striker hian Paris khawpui a pan hnuah match 10 khelin goal li chiah a la khung a, assist vawi khat a nei bawk.
City lakah pawh Messi a la thiam reng a, a ball khawih vel chu mit ti tlai an la tling. Mahse, an team mamawh ber goal a keng tel lo a, Argentine forward-in a hna a thawk ṭha tawk lo.
Mbappe tlanchakzia hmuh tur a la awm a, goal hmaah pawh a la hriam reng. Hetihlai hian Neymar erawh beisei a phak lo a, ball a hloh awlsam a, PSG tana goal khungna remchang a neih pawh holam takin a hlah.
Lehkhaa en mai chuan PSG tlarhma pathum aia thlan tur a awm chuang lo. Mahse, Mauricio Pochettino-a'n a neih ṭhatte an ṭhat dan berin a la chhawr chhuak thei lo a, PSG player-ah thawhhona ṭha a la awm lo niin a lang.
Poch-a hmabak
Manchester United-in Pochettino lakluh an duh nia sawi a awm a, Argentine coach hian Old Trafford pan a hreh lo tih thlengin an sawi - PSG-ah a duh angin thu a nei tawk lo a, superstar rual enkawl a harsat bawk.
Chelsea boss ni ta Thomas Tuchel-a'n PSG a enkawl lai khan superstar rual kaihhruai harsa a tih thu a lo sawi tawh a, a hnuah ṭawng leh dik tawk loh vang tiin pha mah se 'awm' chu a awm tih a chiang.
Poch hian a duh ang takin player-te a la hmin lo tih a chiang a, mahni tawka induh ve tak player rual ho khelh danah inlungrualna a awm lo a, Poch-a'n 'plan' mumal a nei lo em ni chu aw, tih mai tur a ni.
Chutihrual chuan French club hian kil tinah world class player an kawl a, sawi bo nghal an la rem lo - Poch pawhin insiamrem a mamawh a, Messi, Mbappe leh Neymar enkawl a harsat chuan United-a Cristiano Ronaldo leh Paul Pogba te ho enkawl pawh a nuam chuang lo ang.
Kan result avangin ka lawm lo a, chutihrual chuan first half-ah khan City khan an khel ṭhain tlarhnung lam ven ngaihtuah lo thei loin min siam. Goal lut loa chawlhlawk hman a nih hnuah kan khung a, kan insiamrem hman viauin ka hria. Mahse, City-in game an thlak danglam a, goal hnih an rawn khung a, team ṭha tak an nih bawk avangin fak mai tur an niin ka hria. A pawimawh ber erawh last 16 luh a ni. Kan khelmualah City kan hneh a, annin min lo hneh let ve thung. Team pahnih inkar danglamna chu Leipzig kan inhnehtawkpui kha a ni a, chuvanga pahnihna ni kan ni. - Mauricio Pochettino, Paris St-Germain manager
Game ṭha tak a ni a, kan goal hnaiha ball an chan apiang khan a hlauhthawnawm em em zel mai a ni. Mahse, ka sawi tawh angin kan khel ṭha a, vanduai vangin first half-ah kan chance neih kan chhawr lo mai mai zawk a ni. Goal kan chhuah khan minute 10 vel chu kan buai a, mahse, min thlawptu mipui kan nei ṭha a, an chungah lawmthu ka sawi - kan tan zan duhawm a ni. PSG tlarhma hi chu an ṭha em mai a, team ang tawpa tlarhnung ngaihven a ngai. Statistic lam ka hre chiah lo a, mahse, kan khel ṭha viau chuan ka hria. - Pep Guardiola, City manager