Mizo tamna Odisha an chak

Mizoram player pariat kawltu Odisha chuan tun season ISL-a an match hmasa berah Bengaluru chu 3-1 in an hneh. Odisha tan Spanish midfielder Javi Hernandez chuan goal hnih a khung a, season hmasa lawka Spanish second division club Las Palmas tana khel Aridai Suarez chuan goal khat a khung ve bawk.

Bengaluru tan Série B club Avaí aṭanga loan-a an hawh centre back Alan Costa chuan goal khat a khung a, mahse, striker chhuanvawr Sunil Chhetri chuan penalty a pet goal lo thung - Chhetri penalty pet aṭanga ball per chu Cleiton Silva chuan a khungah a inngai a, mahse, penalty pet hmaa a lo tlan luh hman avangin pawm a ni lo.

Odisha tan defender Lalruatthara leh Jerry Mawihmingthanga ten inkhel bul ṭanin minute 90 an khel tluan a, bench aṭangin Lalhrezuala Sailung, Isak Vanlalruatfela leh Isaac Vanmalsawma te an lut bawk a, Daniel Lalhlimpuia erawh bench lamah a awm tluan.

Zanin dar 7:30-ah FC Goa chuan Jamshedpur an mikhual dawn - Goa-ah hian centre back Lalhmangaihsanga (Papuia) chu Mizo awm a ni a, Jamshedpur-in Laldinliana Renthlei, PC Laldinpuia leh Ricky Lallawmawma an kawl thung.