Atlético ngamtu Milan tan beiseina thar

Champions League match li aṭanga point khat lek an hmuh hnuah AC Milan chuan 1-0 in Atletico Madrid an hneh a, last 16 lut turin beiseina thar an nei ve leh ta.

Milan tan Junior Messias chuan inkhela goal awmchhun a khung a, goal luh hun hi minute 87-na a nih avangin mualneitu Atletico tan chhanglet turin hun a tam tawk tawh lo.

Italian club-in beiseina thar an neih avangin phur viau mah se an match tawp bera an hmachhawn tur hi match li an khelha la chak vek Liverpool an ni a, a awlsam lo ang tih a chiang.

Group B inkhel dangah Liverpool hian an mikhual FC Porto chu 2-0 in an hneh a, Thiago Alcántara leh Mohamed Salah ten goal an khung - Reds hian match nga an khelh aṭangin point 15 an nei!

Milan an phur
Atletico khelmualah Spanish club-in beisei an phak lo a, chak la nei lo Milan an hlauhawm zawk - Simon Kjaer, Tiemoue Bakayoko leh Zlatan Ibrahimovic ten Milan tan chance duhawm an nei vek a, Ibra hun ṭha neih Jan Oblak-a dansakte chu pui tak a ni.

Milan an vanduai reng lo. Hun tawp nan minute thum chiah a awm tawh tihah Franck Kessie siamsak chu Junior Messias chuan sang taka zuang chungin a tauh lut a, Wanda Metropolitano Stadium a reh.

Atletico tan Matheus Cunha chuan si phurh sut turin chance duhawm nei mah se a hun ṭha neih a chhawr thei lo a, Madrid khaw club tan last 16 lut turin match tawp berah chak ngei a ṭul phah dawn.

Group B aṭangin Liverpool chu tling chiang tawh an ni a, Porto, Milan leh Atletico ten hmun ruak pakhat luah turin beisei an la nei vek - group stage match tawp ber a ngaihnawm ang.

Chhandamtu Messias
Kum 30 mi Messias-a'n Milan tan inkhel pawimawhah goal a khung a, fans tam takin an la hmelhriat loh forward hi a kum a tlem tawh bik lo a, hriat hlawh loa Milan-a a lo khel reng chu mak tih a hlawh.

Brazilian forward hian kum li liam ta kha chuan Italian fourth division-ah a la khel a, inchhung bungrua delivery hna a thawk tel bawk. Mahse, season hmasa khan Serie B aṭanga inpetkai Crotone tan Serie A-a khel a, match 36-ah goal kua a khung avangin Milan hian loan hmangin an hawh zui.

Hliam vangin Milan a pan hnuah talbuai mah se a hun takah goal pawimawh a khung a, Messias chuan, "Brazil-a ka chhungte leh ṭhiante tan ka goal ka hlan a, a bik takin ka chunga rinna nghat a, Milan-a min hruai luttute chungah lawmthu ka sawi. Midang nen kan zinkawng a inang lo a, hei vang hian min ring tlattute tan ka goal ka hlan a ni," a ti.

Milan coach Stefano Pioli chuan, "Thawnthu ngaihnawm tak a ni a, mahse, bul a la ṭan ve chauh a ni. Theihna sang tak a nei a, a goal khung hian amahah inrintawkna thar a pe ang," tiin a lawmpui hle.

A awl hret!
Champions League group stage-a team inhmachhawn tur puan a nih khan group B hi group of death ang hiala sawi a ni a, mahse, Liverpool ngaihdan a dang thung - an hmaa ding apiang an hneh zel.

Round of 16 an luh thu a chian hnuah pawh inthlahdah an tum lo a, an mikhual Porto chu 2-0 in an hneh. Reds tan Thiago chuan minute 52-naah mawi zetin goal hmahruai a khung a, minute 70-naa Salah-a'n goal a khung theih nana Jordan Henderson nena ball an inpe vel pawh mit titlai a tling.

Salah hian tun season inelna hrang hranga match 17 a khelh aṭangin goal 17 a khung tling ta a, assist vawi sarih a nei bawk - Liverpool hian match 16 chhung chu a zawnin match tinah goal hnih aia tam zel an khung a, kum 1939-a Wolves hnua English club zinga ti leh thei hmasa ber an ni.

Liverpool an tlin chian tawh avangin Jurgen Klopp-a'n khelhna hmun chang tam lo player-te bul a ṭantir nual a, chung zinga mit la fal chu Tyler Morton a ni. Reds youth system chhuak, kum 19 mi midfielder hi Fabinho aiah lutin khelmual laiah minute 90 a hmang tluan.

Tute nge tlang dawn?
Liverpool-in match nga an khelhah hnehna an chan vek avangin an tlang chiang tawh.
Porto-in point nga an neih mek avangin December 7 zana an match tawp berah Atletico Madrid an hneh chuan an tlang ang - result dangin awmzia a nei lo ang.
Atletico tan tlang tur chuan Porto hneh ngei ngei a ngai a, Milan-in Liverpool an draw emaw an tlawm a ngai tel bawk.
Milan tan tlang turin chak a ngai a, Porto leh Milan inhnehtawk a ṭul bawk.
AC Milan leh Atletico hi match tawp berah chak ve ve ta se, head-to-head ah an intluk tawk avangin goal difference en tur a ni dawn. Team pahnihin goal sarih ve ve chhuah mah se Milan-in goal khata an khung tam avangin goal difference-ah an ṭha zawk a, Atletico tan tlang tur chuan Milan chakna aia goal hniha tam zawka chak zel a ngai tihna a ni.