FIFA World Cup Playoff draw ; Italy leh Portugal khingpui tur a hriat dawn

Zanin dar 9:30 hian Zurich, Switzerland-ah Europe aṭanga FIFA World Cup khel tur zawnna playoff fixtures pawh a ni dawn. Playoff khel tur zingah hian European champion Italy leh Cristiano Ronaldo telna Portugal te an tel dawn avangin fixtures pawh tur hian ngaihven a hlawh hle.

Tling tawh
Europe aṭangin ram 13-in World Cup an khel dawn a, UEFA hnuaia ram 55 aṭangin ram 10 an tling tawh. Qatar-a zin ramte chu Serbia, Spain, Switzerland, France, Belgium, Denmark, Netherlands, Croatia, England leh Germany te an ni.

Group A aṭanga tling turin Serbia-in match hnuhnung berah Portugal an hneh a, chakna goal hi minute 90-naah Aleksandar Mitrovic-a'n a khung. Portugal-in playoff an khelh a ṭul phah. Group B-ah Spain tan tling turin an match hnuhnung berah point hmuh a ngai a, an elpui Sweden 1-0 a hnehin an tling.

European champion Italy-in an mualah an elpui Switzerland nen 1-1 in an inhnehtawk pui a, match tawp berah Northern Ireland nen an inhnehtawk leh bawk. Group C aṭangin Switzerland an tling a, Azzurri erawhin playoff khelh a ṭul phah. Group D-ah France-in harsatna an nei lo a, pahnihnaah Ukraine an awm.

Group E-ah Belgium an chungnung a, playoff khel turin Wales-in an match hnuhnung berah Red Devils an chelh bawk. Group F-ah Denmark an tling awlsam a, Scotland-in playoff an khel dawn. Group G an intluk tawk a, Netherlands-in Qatar zin turin an match hnuhnung berah Norway an hneh. Erling Haaland te ram Norway-in World Cup an khel dawn lo a, Turkey-in playoff an khel ang.

Group H-ah Croatia-in World Cup khel turin Russia 1-0 in an hneh hram a, goal awmchhun hi Russian left back Fyodor Kudryashov-a'n an lamah a tihluh a ni. Draw chiah mamawh Russia-in playoff an khelh a ṭul phah. Group I leh J aṭangin England leh Germany te awlsam takin an tling a, Poland leh North Macedonia ten playoff an khel ang.

Playoff chu
World Cup qualifier-a group tina pahnihna ṭheuhin playoff an khel dawn a, chung ram 10-te chu Portugal, Scotland, Italy, Russia, Sweden, Wales, Turkey, Poland, North Macedonia leh Ukraine te an ni. Ram 12-in playoff hi an khelh dawn avangin hmunruak pahnih hi Nations League aṭangin an thlang a, Austria leh Czech Republic te an tling.

Nations League-a mahni group ṭheuha pakhatna chu an chet ṭhat dan indawtin an rem a; a indawt dan chu France, Spain, Italy, Belgium, Wales, Austria, Czech Republic, Hungary, Slovenia, Montenegro, Albania, Armenia, Gibraltar leh Faroe Islands te a ni.

League A khel pha chin France, Spain, Italy leh Belgium te chuan qualifier hmangin an tling a, League B-a che ṭha ber Wales pawh qualifier hmangin an tling. Qualifier-a tling pha lo Austria leh Czech Republic ten Nations League hmangin quota pahnih chu an hnawh khat a, an hnuaia ram awmte tan beisei a awm tawh lo.

Ram lian leh player langsar
Ram pathum chiah hmun ruak a awm tawh a, ram langsar bakah player langsar an la awm. Portugal-ah ringawt hian star rual an la awm. Cristiano Ronaldo tel lo pawh ni se Ruben Dias, Joao Cancelo, Bruno Fernandes, Bernardo Silva, Diogo Jota leh Joao Felix te hi star an ni pha vek.

Italy hi Europe-a champion zo hlim an ni a, best player atana thlan Gianluigi Donnarumma bakah Leonardo Bonucci, Jorginho, Marco Verratti leh Federico Chiesa te hi World Cup khel lo tur atan chuan an uiawm hle.

Sweden-in Zlatan Ibrahimovic an kawl a, Poland-in Robert Lewandowski an nei a, Wales-ah Gareth Bale a awm bawk. Ram lian leh player langsar zingah World Cup khel lo tur an awm dawn tih chu a chiang ta hle.

Playoff kalhmang
Playoff khel tur ram 12-ah team paruk chu seeded a ni a, seeded team mualah zel an inkhel ang. Seeded team-te chu Portugal, Scotland, Italy, Russia, Sweden leh Wales te an ni. Unseeded team paruk dangte chu Turkey, Poland, North Macedonia, Ukraine, Austria leh Czech Republic te an ni bawk.

Ram 12 te hi group pathumah an ṭhen ang a, group khat aṭangin team khat ṭheuh an tling dawn. Group tinah hian semifnal leh final a awm dawn. Semifinal hi seeded team zelin an thleng ang a, final erawh ṭhumvawr hmanga zawn tur a ni thung.

Portugal, Italy leh Sweden te hi seeded zingah an tel phak vek avangin semifinal-ah an inhmachhawn dawn lo a, amaherawhchu final-ah an inhmachhawn theih avangin 'draw' hi a pawimawh dawn. Football ngainatute chuan Portugal leh Italy hi group khata awm lo turin an duh ang.