Dortmund pet chhuaktu Sporting

Champions League last 16 lut tur zawk inchuhna inkhelah Sporting Lisbon chuan Borussia Dortmund 3-1 in an sawp a, match khelh hmabak pakhat la awm mah se Bundesliga pahnihna Dortmund tan knockout stage luh beiseina a tawp.

Lisbon khawpuia inkhelah Sporting tan Pedro Goncalves-a'n goal hnih khungin Pedro Porro chuan goal khat a khung ve bawk. Second half-ah Emre Can hnawhchhuah a ni a, hun tawp dawna Donyell Malen goal khungin awmzia a nei lo.

Mangṭha Dortmund
Signal Iduna Park-a an intawn ṭumin Dortmund hian 1-0 in hnehna an chang, tun ṭuma an intawh leh hma hian point kua ve ve an hmu. Portuguese champion tan midang result ngaichang loa tlang tur chuan chak a pawimawh.

Chawlhlawk hmain Sporting lamin attacking midfielder Pedro Goncalves hmangin goal hnih an nei hman. Dortmund lam tan chuan thih thaa beih a ngai tawh, inkhel chawhnu lamah midfielder Emre Can dah luh a ni.

Liverpool leh Juventus tan pawha khel tawh Can hian tawnhriat nei ṭha mah se inkhel pawimawhah a chesual, minute 74-naah Pedro Porro laka a foul avangin hnawhchhuah a ni a, player kim loa an khelh hnuah goal khat an phurh belh.

Inkhel pawimawha an chak loh avangin Dortmund hi Europa League lamah an inlan chhunzawm a ngai dawn. Sporting erawh hmahruaitu Ajax hnung zuiin last 16 huangah an inhlangkai thung a ni.

Tihsual a pawi
Dortmund captain Marco Reus chuan, "Player hliam leh khel thei lo an awm chu chhuanlama hman a rem lo, hei chu football-in a ken tel a ni. A pawi ta ber chu kan tihsual kan siamṭha thei tlat lo kha a ni, chhuanlam dang a awm lo.

"Goal chhuah palh chu a awm thei, chhuah nawn kha a pawi. Player 10 kan nih hnuah khan Sporting ai khan kan khel ṭha zawk emaw tih mai tur a ni, a tawp thlenga kan beih theih avang erawh chuan a lawmawm," a ti.

Sporting manager Ruben Amorim, "Team ṭha tak kan hneh thei a ni tih a takin kan lantir. Dortmund hi Bundesliga lamah an kaltluang a, tun hnaiah pawh result an nei ṭha hle, anni kan hneh thei hi a lawmawm.

"Last 16 kan lut a, hei hi kan thil tum hmasa chu a ni. Kan tum ram kan thlen avangin kan duhtawk mai tur erawh a ni lo, hna thawh hmabak tam tak kan la nei tih hriat a ngai," tiin theihtawp chhuah chhuanzawm an tum tur thu a sawi.

100% Ajax
Erik ten Hag enkawl Ajax hi European team hmuhnawm berte zinga mi an ni mek. Dutch club hian Sebastian Haller-a goal hnih hmangin Besiktas chu 2-1 in an luhchhuah a, match nga an khelh tawhah hnehna an chang fai vek.

Kum 27 mi Haller-a'n tun season Champions League match nga a khelh aṭangin goal kua a khung a, inelna hrang hrangah match 19 a khelh aṭangin goal 18 a khung tawh - West Ham striker hlui hian Ajax tan a vanglai a hmang.

Ajax coach Erik ten Hag chuan, "Hun chanve hma lamah goal khat kan phur, a hnuah goal hnih hmanga chhangletin hnehna kan chang. Inkhel awlsam a ni lo, a bik takin Besiktas muala kan thawh leh theih avangin ka naute rilru huaisen zia a lang chiang," a ti.

Dutch manager Erik ten Hag hian Eredivisie-ah pawh a naute hi hma a hruaipui mek. Season duhawm an hman avangin sawi an hlawh a, manager tur zawng mek Manchester United nena sawi zawm a ni pawh hi a mak hran lo.