Europe-a a thiam 16 zingah Real & Inter

Champions League ṭantirah Sheriff Tiraspol pawr viau mah se group stage tawp a hnaih meuh chuan eng ruai an ang lo a, group D aṭanga last 16 lut tur hriat nan match tawp ber nghah a ngai lo.

Real Madrid chuan Santiago Bernabeu-a an ngam loh hnu Sheriff hi khualmualah 3-0 in an hneh a, match nga aṭanga point 12 hmuin last 16 an lut fel ta - Sheriff erawhin Europa League lamah hun an hmang ang.

Carlo Ancelotti enkawl team tan David Alaba, Toni Kroos leh Karim Benzema ten goal khat ṭheuh an khung a, Sheriff lamin mahni mualah an mikhual chhanletna tur goal an nei lo.

European club football inelna sang berah Inter Milan pawhin a thiam 16 zinga tel loh bik an duh lo a, Edin Dzeko goal hnih khung hmangin an mikhual Shakhtar Donetsk chu 2-0 in an hneh - last 16 an lut.

Real thawhlehna
King Carlo hoin Real-in an match hmasa berah Inter ngam mah se match hnihnaah Sheriff chu 1-2 in an ngam lo zui a, Moldovan club laka an result avang hian sawiselna an tawk nasa hle.

Mahse, Real-in 5-0 a Shakhtar sawp zuiin Sheriff laka tlawm hnuah an tlawm nawn leh tawh lo a, match khat khelh tur la awm mah se an tan lungkham a ṭul tawh lo - a thiam 16 zingah an tel tawh miau a!

Real tan hian Alaba chuan minute 30-naah freekick hmangin goal hmahruai a khung a, first half hun pek belhah Kroos chuan a belhchhah - Benzema-a'n reh reng a duh bik lo a, minute 55-naah tun season-a match 17 a khelh aṭanga a goal 15-na a khung.

Sheriff erawh group stage match hmasa pahnihah Shakhtar leh Real an hneh avangin an thawm lian viau mah se a hnu match thum an khelhah an tlawm vek a, Europa League preliminary knockout round khel turin an tla.

A man aia hlu Dzeko
Inter CEO Giuseppe Marotta-a'n, "Euro maktaduai 115-in Romelu Lukaku kan hralh a, a thlawnin Edin Dzeko kan lalut thung. Khelmualah erawh danglamna a awm lo," tiin a lo sawi tawh a, khelmuala Dzeko chet dan thlirin hnial a harsa.

Kum 35 mi striker hian Inter-in a kum a tam tawh chunga an rin chhan pholangin minute 61 leh 67-naah Shakhtar lakah goal a khung a, Bosnian striker goal khung hi Ukrainian club-in an chhanglet thei lo.

Dzeko hian Inter a pan hnuah inelna hrang hrangah match 17 khelin goal 10 a khung tling leh der tawh a, Inter lamin an tihsual lohzia a lang zel - season hmasa khan AS Roma tan goal 13 a khung a, season hmasaa a goal khung zat phak turin goal thum chiah a mamawh tawh tihna a ni.

Match nga an khelh aṭanga point 10 neitu Inter hian December 7 zanah group stage match tawp ber khel turin Real Madrid an lenchilh dawn a, group hmahruaitu ni chunga last 16 luh chiah chu team pahnih tan khelh chhan tur a ni tawh ang.