Quarterfinal-ah Sindhu

PV Sindhu chuan nimin chawhnu lam khan Yvonne Li hnehin Indonesia Open Super 1000-ah quarterfinal a in vaw kai a, inkheltir aṭanga a tawp thlengin harsatna lian tham a tawk lo.

Badminton world champion lai hian minute 37 chhung lekin 21-12, 21-18 in hnehna a chang, a match lehpekah chuan Beatriz Corrales leh Sim Yujin te inkhela chak zawk a hmachhawn leh ang, an sulhnu en chuan Sindhu tan khingpui harsa tur an ni hran lo ang.

A match hmasa zawkah Sindhu-i'n Aya Ohori chu 17-21, 21-17, 21-17 in a hneh hram. Japanese nula lakah a khel ṭha tawk lo a, tun ṭumah erawh nasa takin hma a sawn tih a lang - Denmark star Li tan hun remchang a siamsak ve miah lo.

Rio leh Tokyo Olympic medal la thei Sindhu hi tun hnaiah a inkhel tam lo, hri leng leh thil dang vangin tournament ṭhenkhat aṭangin a inhnukdawk. Kuminah inelna hmachhawn tur a tam tawh lo a, tun ṭumah hian a ṭha thei ang bera a hmawr bawk a tum ruh hle.