A vawi 16 nan Warriors an chak

Golden State Warriors chuan season bul an ṭan fuh an chhawmnung zel a, nimin zing khan Stephen Curry leh a hote hian Philadelphia 76ers chu 116-96 in an hneh a, kuminah vawi 16 an chak tlinna chiah a ni.

Chase Center-a inkhelah Warrios hi quarter hmasa berah an hniam zawk. Mahse, a dang pathumah erawh GSW hi a chungnung zawk an ni vek. Quarter hnuhnung berah phei chuan 30-12 ngawtin an sang zawk.

Stephen Curry-a'n point 25 a nei a, court chhungah minute 35 hmangin Golden State player zinga point leh minute ngah ber a ni. Ani bakah hian Andrew Wiggins, Draymond Green, Jordan Poole, Juan Toscano-Anderson leh Otto Porter Jr. ten point 10 chuang an nei vek bawk a ni.

Golden State hian NBA regular season match 18 an khelh tawhah vawi hnih chiah chak loh an nei, season hmasa khan table mawngphah lamah talbuai viau ṭhin mah se an insiamṭha tawh hle. Tun dinhmunah chuan Western Conference hmahruaitu an ni mek.

Inkhel dangah Phoenix Suns an kal fawr zel. Suns hian Cleveland Cavaliers chu 120-115 in an hneh, tun hnaia match hnuhnung 14-ah hnehna an chang fai vek; table-ah pawh Warriors chiah tluk loh an nei.

Tuna an chak kaltluang lai hi October 3 aṭanga inṭan kha niin, chumi ṭuma an hneh chu Cleveland hi an ni. Tun ṭuma an chak theih nan hian Devin Booker-a'n point 35 a nei a, ani bakah hian assist vawi 12 neitu Chris Paul a hmuhnawm leh hle.

LeBron James chuan hremna a hmang zo a, a lo kir lehna hmasa berah point 39 neiin Los Angeles Lakers chu Indiana Pacers lakah 124-116 in hnehna a chanpui. Team pahnih an inkhel tawk a, overtime an khelh laiin James hian 3-points pawimawh tak a lut.

NBA Results
Chicago Bulls 113 - 118 Houston Rockets
Detroit Pistons 93 - 114 Milwaukee Bucks
Miami Heat 101 - 113 Minnesota Timberwolves
Washington Wizards 102 - 127 New Orleans Pelicans
Utah Jazz 110 - 104 Oklahoma City Thunder
Toronto Raptors 126 - 113 Memphis Grizzlies
Atlanta Hawks 124 - 106 San Antonio Spurs
Philadelphia 76ers 96 - 116 Golden State Warriors
Portland Trail Blazers 121 - 125 Scaramento Kings
Indiana Pacers 116 - 124 Los Angeles Lakers