Argentina-in an chhandamtu Nigeria an khengbet!
Thih leh dam kara leng Argentina mualpho taka liam mai tur chu Nigeria-in Iceland an hneh vangin an nung thar leh a, Argentina chuan anmahni chhandamtu Nigeria hnehin World Cup round of 16 an lut!
Lionel Messi inlar zanah hun tawp dawna Marcos Rojo goal hmangin Argentina in 2-1 in Nigeria an hneh a; inkhel dangah group hmahruaitu Croatia-in Iceland 2-1 a an hneh bawk avangin Croatia leh Argentina hian knockout round an khel ang.
Thawhlehni zan khan Group D chinfel niin, La Albiceleste captain Messi-a'n a goal hmasa ber a lawmna aiin, hun tawp dawna Rojo goal a lawmpuina a nep chuang hauh lo–Jorge Sampaoli naute hian June 30 zanah France an hmachhawn leh dawn.
Match thum an khelh aṭanga chak fai vek Croatia chuan July 1 zanah Denmark an hmachhawn ve thung dawn a ni.
Mamawh chhanna Messi
Saint Petersburg Stadium-ah chak loh thiang lo nichungin Argentina an lut a, an khingpui Nigeria tan erawh knockout round lut turin point khat hmuh theih a tawk. Match hmasa bera goal khungtu Sergio Aguero chu bench-ah dah niin, midfielder Ever Banega chu a vawi khat nan bul ṭantir a ni thung.
Sevilla midfielder Benega hian halfway line bul aṭangin ball pet thiam bik a nihzia a lantir. Nigeria defender khum tawk chauha a vawrh luh chu Messi-a'n a ke hman thiam vei lamin thunun nuam tawk chauhin a la thla a, lei a thlen hmain a kea dawng zuiin rang zeta a insiamrem hnuah ding lamin goal ṭha bik a khung.
Barcelona thiampuipa Messi-a'n free kick aṭangin an goal hnihna khung theihna nei mah se a vanduai. Nigeria player intlar hrula a ball pet kawh zet chuan keeper Francis Uzoho paltlang mah se goal ban a per hlauh–a vanneih ṭum a ni lo. Croatia an hneh loh ṭum khan Messi-a'n vawi 49 chiah ball a khawih, Nigeria lakah erawh first half chhungin vawi 40 chuang a khawih hman.
Argentina lamin inkhel thunun viau mah se penalty aṭanga goal an chhuah avangin, chak turin hun tawp dawn thleng an nghah a ngai.
Minute li chauh a awm tawh a, Higuain leh Aguero-te inkawpin goal an hlawh chhuah theih loh lain Rojo a rawn lang. Manchester United defender hian mual sir aṭanga Gabriel Mercado-a cross chu lei a tlak thlen hmain chiang lutukin a pet lut.
Pawi tih a zual
'Tling ṭhelh apiang pawi tih a zual' tih hi Nigeria dinhmun sawifiahna ṭha tak pakhat a ni thei ang.
Messi an ven hneh loh avangin goal chhuah mah se, minute 51-naah Victor Moses-a penalty hmangin an sut. Corner aṭanga ball rawn kal an inchuhna lamah Barcelona midfielder hlui Mascherano-a'n defender Leon Balogun chu a kuta a chelh avangin penalty a chawi–an vanneiah a ngaih theih.
Super Eagles hian 1-1 a nih laiin a vawi hnih nan penalty an beisei leh, striker Ahmed Musa cross tauh chhuaktu Rojo-a'n a banin ball a khawih fuh ngei mai. Mahse, referee Cuneyt Cakir-a'n video assistant referee (VAR) a râwn hnuah hrem tur niin a ngai lo a, Gernot Rohr naute tan last 16 luh theihna hun ṭha a liam zui.
African team hian an match hnuhnung zawka Iceland an hneh avang khan beiseina an nei sang hle a, hun tawp hma minute nga a la awm thleng kha chuan an him. Mahse, an inveng zo ngang lo.
Inkhel an thlir kir leh ang a, striker Odion Ighalo-a'n keeper Franco Armani chauh a hmachhawn hnua a khung loh kha an ui thar leh ṭhin ang.
Nigeria hian World Cup bikah South American ram hi an ngam lo hle, vawi ruk an hmachhawn tawhah an tlawm vek. Heng match paruk zinga vawi nga chu Argentina (1994, 2002, 2010, 2014, 2018) lakah a ni. An chak loh vangin Nigeria tan a na a, chutih rualin an squad hi chawh rualin kum 24 bawr chauh an nih avangin hmabak an nei eng hle.