England vs Belgium ; Beisei ang a ni dawn em?

Zanin dar 11:30-ah England leh Belgium-in group stage-a an match hnuhnung ber khelin an inhmachhawn dawn a, he inkhel tur hi mipui beisei ang a ni ang em? tih chu zawhna awm thei tak a ni.

England leh Belgium hian zanin dar 11:30 veka inlan tur Tunisia leh Panama an hneh ve ve tawh avangin last 16 an lut chiang tawh a, zanin an inkhel tur hi group hmahruaitu nih inchuhna chauh a ni tawh dawn.

Hetihrual hian team pahnih hmaa ding tawh hi Panama leh Tunisia an nih avangin fiahna hautak la hmachhawn loah ngaih theih an ni a, zanin hi fiahna an hmachhawn hun turah a ngaih theih.

Team pahnih awmna group aṭanga hmahruaitu leh pahnihna hian Group H aṭangin Japan/Senegal/Colombia zinga tu emaw ber hi an hmachhawn dawn a, pakhatna leh pahnihna tan duh thlan tur bik an awm chuang lo. Hei vang tak hian team pahnihin in en 'chhin' leh chawlh hahdamtir nan an hmang thei.

Chawlh hahdam maw?

Gareth Southgate-a'n engtiang takin nge a player ho a remkhawm ang tih chu zawhna awm a ni a, England coach hian thutlukna a siam dan tur erawh a la sawi chiang duh lo.

Player a nih laia England tana vawi 57 inlan thei coach chuan, "Starting XI-a tel tluan zak chunga semifinal thlen dan ka hrethiam a, regular player nichunga inhliam avanga inhnuhdawh a ngaiha awm dan pawh ka hria.

"World Cup-ah meuh hruai nive si a, inkhelh miah loha rilru hrehawm duh zia pawh ka hria," a ti a, chiang takin sawi lo mah se player khelh dan a thlak dawn niin a lang.

English coach hian player a thlak danglam dawn a nih chuan starting XI-a hmun chang phak lo Marcus Rashford, Jamie Vardy, Danny Welbeck, Gary Cahill leh Fabian Delph te ho kan hmuh a beiseiawm dawn tihna a ni–an la ṭha thawkhat hle!

Mahse...

Major tournament thawnthu hlui keu let a nih chuan starting XI ngai ring 'ngun' team an champion ṭhin a, hei hi Southgate-a'n 'thawnthu hlui' tia a ngaihthah ringawt a nih chuan a tisual thei.

Player khel tluang, in man lai 'chawlh' tir thut hi 'hahdamna' ai mah chuan khel tluang lai ti bahlah tu a ni ve thei–a bik takin Harry Kane-a'n bench a ṭhut a chakin a rinawm loh.

Tottenham Hotspur striker hian match hnihah goal nga a khung tawh avangin a World Cup hmasa berah top scorer ni turin a dinhmun a ṭha takzet a, a chance neih ṭhatah bench-a hun hman liam mai mai a duh lo ang.

Hetihlai hian Panama laka England player inkhel bul ṭan te chu nimin khan an thlenna hotel lamah chawlh hahdamna hun pek an ni a, substitute bench lama hun hmang te erawh training neih tir an ni thung.

Belgium 'dang'

World Cup squad-ah player 23 an awm a, Belgium chuan heti zat player an hruai aṭang hian player 17 ngawt khelmualah an inlan tir tawh–Three Lions nena an inkhel turah pawh coach Roberto Martinez chuan squad a siksawi tur thu a sawi.

Everton boss hlui chuan, "Ka player-te hian World Cup-a khelh an phu vek a, player zawng zawngin an theihna pholanna hun remchang neih hi an phu a, he team tan hian eng tiang taka ṭangkai nge an nih theih ang tih en nan pawh chu chu a ṭha a ni.

"Ka player zingah hian inkhel bul ṭan chiang tumah an awm lo tih hi kan thlir dan chu a ni," tiin a sawi a, a chhawr rim deuh ho hahchawlhtir a tum niin a lang.

Belgium player zingah Tunisia nen an inhmachhawn ṭuma inhliam Romelu Lukaku leh Eden Hazard te chu dam tawh mah se England hmachhawn tir an nih a rinawm loh a, hetihlai hian hliam nei chunga an hruai Vincent Kompany chuan training a zawm ve leh tawh thung.

Martinez a fimkhur

Belgium player zingah match hnih an khelh aṭangin yellow card vawi khat hmu tawh pathum an awm a, midfielder Kevin de Bruyne, centre-back Jan Vertonghen leh right-back Thomas Meunier te hian England lakah yellow card an hmu leh a nih chuan last 16 an khel lo ang.

Martinez chuan hei hi hriain England nena an inkhel chu 'risk' lakna chiah a ngai lo a, last 16 an luh tawh tho avangin player pathum hi Three Lions lakah a chawlh hahdamtir a rinawm tawh zawk.

Spanish manager chuan, "Tuna pawimawh ber chu hrem theih dinhmuna awm kan player te dinhmun hriat chian hi a ni. Yellow card hmu tawh sa England laka chhawr hi 'risk' sang tak a ni dawn. Last 16 kan la hmabak avangin player zawng zawng hi chhawr theihin awm se ka duh a ni," a ti.

Kum 44 mi manager hi a thusawiah a ding nghet dawn a nih chuan inkhel bul la ṭan lo zingah Nacer Chadli, Simon Mignolet, Kompany, Mousa Dembele leh Marouane Fellaini te hmel kan hmuh a rinawm.