Egypt coach a bang

World Cup group stage aṭanga hneh nei loa an tlak hnuah Egypt coach Hector Cuper chuan African team hi a chhuahsan a, Russia-ah che ropui lo mah se Egypt coach neih ṭhat zingah erawh a hming a chuang reng tawh ang.

Kum 62 mi manager hian kum 2015 aṭang khan Egypt hi a enkawl ṭan a, 2012, 2013 leh 2015-ah te Africa Cup of Nations pawh an inpetkai zawh loh hnuin 2017 khan Africa khawmualpuia inelna sang ber hi a hruai thleng leh a, final hial a khelhpui.

Kumin World Cup khel tura a hruai thlen khan kum 1990 hnua Egypt-in World Cup an khelh leh vawi khatna a ni bawk. Egypt Football Association (EFA) chuan thuchhuah siamin, "Russia aṭanga kan kir hnuah meeting kan nei a, Cuper leh a staff-te chungah lawmthu kan sawi a ni.

"Cuper-a hnathawh ropui tak kha kan hre reng. Africa Cup of Nations-ah kum thum ngawt kan inlan loh hnuin final min hruai thleng a, kum 28 hnuah World Cup min khelhpui bawk a ni," an ti.

Egypt hi Group A-ah Uruguay (1-0), Russia (3-1), Saudi Arabia (2-1) te nen awmhoin an chak lo vek a, Valencia leh Inter Milan boss hlui hian Pharoah hi a chhuahsan phah ta a ni.