Senegal, Colombia, Japan–beisei an la nei!
World Cup ṭan hma hauhin Group H chu ngaihnawm tura ngaih a ni a, a sual lo. Zanin dar 7:30-ah he group hian an match hnuhnung ber an khel dawn a, team pali zinga pathum chuan last 16 luh beiseina an la nei vek!
Poland chu beisei tur nei tawh lo awmchhun an ni a, an hmachhawn tur hi Japan a ni. Poland-in point an la hlawhchhuah loh laiin Samurai Blue erawh draw result-a tlang thei an ni thung.
Colombia-in match hmasa bera Japan an hneh loh hnuah Poland hnehin inkhel hmuhnawm an pho chhuak a, he team hi last 16 lut turin an ṭha tawk–an hmachhawn tur hi draw result chiah mamawh tawh Senegal an ni a, Colombia tan chak ngei ngei a ngai thung.
Cisse beiseina
World Cup 2002-ah Senegal-in quarterfinal an thleng a, hetih hunlaia an captain chu tuna an coach Aliou Cisse hi a ni. South Korea leh Japan-inthlen ṭawm World Cup-ah khan an match hmasa pahnihah point li an hmu a, a tawpah South American team Uruguay chua 3-3 a draw-in last 16 an lut.
Teranga Lions dinhmun hi 2002 nen a in ang hle–match hnih khelh tawhah point li an nei tawh a, a tawpah South American team an tum dawn–2002 a an captain kha tunah erawh coach a ni ta.
Kum 42 mi manager chuan, "Last 16 lut turin point khat chauh kan mamawh tawh a, knockout round luh ngei kan tum ang. He team hian thui tak thlenga he inelna hmachhawn hi an phu a ni," a ti.
Senegal tan ṭum dang ang bawkin Sadio Mane chu innghahna tur a ni. Cisse chuan, "Mane chungah hi chuan beiseina a sang ṭhin a, thlir bik a nih pawh a awm lo hran lo. Poland aiin Japan lakah a khel
ṭha zawk a, tunah chuan Colombia laka a khelh ṭhat lehzual a ṭul ang," tiin Liverpool forward chunga an innghah thu a sawi.
A eng lam thlirin...
Senegal-in draw result chauh an mamawh avangin an dinhmun a duhawm zawk niin lang mah se Colombia coach Jose Pekerman ngaihdan erawh a ni ve lo a, hnehna chang tura an ṭhat tawk thu a sawi.
Pekerman chuan, "A ṭha thei ang bera khelhchhuah kan tum a, kan tan chuan chak loh a thiang lo–chumi tur chuan theihna kan nei bawk. Kan match hnuhnung ber in en phei chuan theihna kan neihsan zia in hmu chiang lehzual ang," tiin nimin khan media ho a kawmnaah a sawi.
Kum 68 mi manager thusawi hi ṭawmpui loh ngawt chi a ni lo. Colombia hian Japan an ngam loh khan minute thumna lekah Carlos Sanchez chu hnawhchhuah a ni a, penalty an chawi zui a, hliam vangin James Rodríguez chuan inkhel bul a ṭan thei lo bawk.
Poland lakah erawh player kimin, Rodríguez bul ṭantir chungin an khel a, 3-0 in an chak. Pekerman chuan Senegal hmachhawn tura a player te an dam kim thu a sawi a, Teranga Lions dinhmun a him lo.
Nishino a inringtawk
World Cup khelh hma thla khat vel chauh a awm tawh tihah Akira Nishino chu Japan coach tura ruat a ni a, Japanese coach hian hun rei lote chhungin Asian team hmuhnnawm ber pawl a din thei.
Nishino chuan, "Poland aiin khelh chhan kan nei ṭha zawk a, chak duhna thinlung kan nei lian zawk. Inrintawkna nasa tak nen Poland lakah hian kan khel ang," a ti a, last 16 an luh a inbeisei.
Japan-in Europe-a inkhel player kawl nual mah se team dang angin player langsar vut tia sawi tur an kawl lo. Mahse, Southampton defender Maya Yoshida chuan hei hi an ṭhatpui thu sawiin, "Player tinin mawhphurhna inchen vek kan nei a, chu chuan ṭha takin min khelhchhuah tir a ni," a ti.
Hetihlai hian beisei tur nei tawh lo mah se Poland-in awm mai mai an tum bik lo a, tlarhmaa an chhuanvawr Robert Lewandowski chuan, "Kan fan-te tan hnehna chan kan duh a, he hmunah hian tihpalh thil thua tel kan ni lo tih pholan kan duh a ni," tiin a sawi.