1st Aijal Club Challenger Tennis League Club tel tur panga a hriat ta
Mizoram Tennis Association (MTA) buatsaih 1st Aijal Club Challenger Tennis League khel tur team panga chu club neitu nen nimin khan tihchian a ni a. ATC Love All, Aizawl Acers, Zarkawt Xenons, Aijal Club Bulls leh K12 Acers te chu category parukah an inel ang.
Tennis inelna lian hi August 11 aṭangin Aizawl Tennis Court-ah khelh ṭan tur a ni a, July 7 hian Aijal club-ah player auction neih a ni ang. Team pakhatah hian player panga aṭanga 10 an awm theih dawn a, player pakhatin category hnih an khel thei dawn bawk.
A khel tur playing list-ah hian MTA registered player pathum tal an awm ziah tur a ni a, MTA player-te chu auction hmang hian club-te hian an lalut thei dawn a ni.
Inelnaa category paruk awm turte chu men's singles, ladies singles, junior singles (Under 18), 35+ doubles, open doubles leh mixed doubles te a ni a. Open doubles-ah hian kum 35 pel tawh leh player naupang zawk pawh a ṭangkawp theih ang.
Tualchhung tennis tinung thar tur hian June 22 khan MTA, Aijal Club leh Zonet chuan inremna thutlung an ziak a. He inremnaah hian Aijal Club chuan inelna senso an tum ang a, Zonet chuan inelna hi an pechhuak ṭhin ang.