Wimbledon khel tur Sharapova

Australian leh French Open an khel zo tawh a, tuna hmabak lian ber chu July 2 aṭanga khelh tur Wim­bledon a ni. Grass court inelna lianah hian Maria Sharapova a inlan dawn.

Russian nula hi hrem leh hliam vangin All England Club-ah a inlan theih lohna a rei tawh a, tun hnai kum thum hmua a inlan lehna hmasa tur a ni. Season li zet Grand Slam nomawi a chawi tawh loh avangin kuminah hlawhtlin a tum ruh hle.

World number 1 hlui Sharapova chuan, "Player zawng zawngin hlawhtlin an châkna hmun a ni a, kei pawh nomawi chawi duh zinga mi ka ni," tiin a sawi. French Open-ah pawh Sharapova hian player hlauhawm a la nih zia a lantir tawh a, Lon­don-ah pawh midang tan hmachhawn a châkawm loh khawp ang.

Kum 31 mi Sharpova hian major title panga a la tawh a, hmeichhe infiammi zinga sum lalut hnem ber dinhmun pawh hun rei tak chhung a lo luah tawh bawk. Mahse, damdawi hman phal loh a hman avangin thla 15 chhung hrem a ni a, hremna a hman zawh tawh hnuah hlawhtlinna lian tham a la chang leh rih lo.