World Cup khel lo langsar

FIFA World Cup 2018-ah ram 32 tan chauh inlan theih a nih avangin football ngaina leh atchilh tak tak ram inlan thei lo an awm nual. Ram ṭhenkhat chu tlin beiseina nei phak chiah chung lo chunga qualifying khel an awm a, ṭhenkhat erawh an mahni khelh chhiat vang ngeia inlan phak lo tur an ni thung.

Kumin nipui laia Russia pan lo zingah Italy an langsar a, South Amercia aṭanga inpet kai zo lo Chile pawh an te bik chuang lo. Netherlands, United States leh Wales fans pawhin Moscow khawpui mawina hmu loin, anmahni inlum aṭangin World Cup an thlir a ṭul a ni.

Italy

Italian Football Federation president Carlo Tavecchio-a’n Antonio Conte hmun ruak luah tura Giampiero Ventur lakluh a nih thu a puan khan, “Sulhnu ropui kan siam ho ang,” tiin a sawi. Mahse, World Cup vawi li champion tawhin a hnu kum tam a liam hmaa an hriat chu 1958 hnua a vawi khat nan World Cup an khel phak dawn lo tih a ni.

Europe qualifier Group G-ah Italy hi awmin, an elpui ber Spain an ngam loh avang­in pahnihna an ni. Azzurri hian playoff-ah Sweden an hmachhawn a, khualmualah si khat faiin chak lo mah se an khelmualah chak tho tura ngaih an ni. Mahse, beisei angin thil a kal ngawt bik lo, an intawn vawi hnihnaah pawh goal an khung loh avangin Russia ticket an hlawh chhuak zo lo.

World Cup an khelh phak loh avang khan Italy ram a ngui a, football ngainatu chauh ni loin, ram mipui an ṭap. 2006 an champion ṭuma player pawimawh Gianluigi Buffon, De Rossi leh Andrea Barzagli te chuan ram tana inkhelh an chawlhsan thu an puang zui bawk.

Lungngaihna chhumin Italy a hual vel laiin, journalist hming­thang tak pakhat Massimo Grame­llini chuan, “Khawvel tawp a la ni hleinem, kan tan 2018 World Cup a tawp mai chauh a ni,” tiin an rama player naupang zawkte nen huaisen taka an thawh chhuah leh tur thu a sawi.

Chile

A zawna Copa America cham­pion ni thei Chile hi World Cup khel phak ngei tura dah zingah an tel phak. South America qualifying an khelh lai pawhin team langsar an ni, match thum khelh tur an la neih laia tling tura an mamawh zat chu point li chiah a ni.

Amaherawhchu, Chile hian Paraguay an inhnehtawkpui a, kum 2000 hnua a vawi khat nan Bolivia an hneh loh bakah Brazil lakah si thum fai ngawtin an tlawm a, an beiseina a thamral zui bawk. Manchester United forward Alexis Sanchez leh Bayern Munich midfielder Arturo Vidal te hmel kan hmu thei ta lo a ni.

Chile tlin zawh loh chhanah inhnialna a tam a, an puh ber pakhat chu coach a ni. Jorge Sampaoli a chhuah hnuah, a hmunruak luah­tu Juan Antonio Pizzi-a’n Copa America Centenario nomawi chawipui mah se, Chile hian tun hma lama an inpumkhatna leh thawh­hona ṭha ang kha an nei thei lo.

Netherlands

A zawna a vawi hnih nan Netherlands chu ram leh ram football hmanga inelna lianah an tel phak dawn lo. Guus Hiddink thlaktu coach Danny Blind-a’n Euro 2016 a khelhpui phak lo chungin a chungah rinna nghah zui a ni.

Football thiam ram tia hriat ṭhin hian beiseina sang tak nen World Cup qualifying an khel. Mahse, Netherlands hian France leh Sweden an tluk lo a, playoff pawh khel phak loin an zinkawng a tawp. Holland hian 2010 World Cup khan final an thleng a, Spain lakah an chak lo - 2012 khan pathumna an ni bawk.

World Cup an khel phak dawn lo tih a chian hnuah Netherlands captain Arjen Robben-a’n ram tana inkhelh a chawlhsan zui. Kum 33 mi Robben hian an qualifying match hnuhnung bera Sweden 2-0 an hnehna goal hnih khung mah se, an match hmasa lamah an chet chhiat em avangin an ram tan a tawk zo lo.

Wales

Wales-in an mikhual Republic of Ireland hneh ni se la chuan, playoff khel turin an tling ang a, 1958 hnua a vawi khat nan World Cup khelh an beisei ang. Mahse, an buzawlah ngei Ireland lakah si khat faiin an tlawm a, Euro 2016 khel thei ram hi Russia-ah chuan kan hmu ta lo a ni.

A hunlaia khawvel player manto ber Gareth Bale-a’n hliam vangin qualifying match pawimawh ṭhenkhat a khel thei lo. Arsenal midfielder Aaron Ramsey pawh hliam vang bawkin a inlan kim thei lo - an player langsar pahnih te hian match khel kim thei ni se chuan a dinhmun a danglam phah mai thei.

World Cup leh pek 2022-ah chuan Real Madrid forward Bale chu kum 33 mi niin, Ramsey (31years) leh Allen (32) te pawhin kum 30 an chuang tawh ang. Rawlthar beiseiawm, Liverpool forward Ben Woodburn ten hma an sawn zel a nih chuan an hranghluite nen hian an la inlan ho hman tura ngaih a ni.

United States

Match hnuhnung bera Trinidad & Tobago hneh ngei ngai chungin United States an inlan a, khualmualah si hnih faia an tlawm avangin kum 1986 hnua a vawi khat nan World Cup an khel phak lo. Inelna lian khel leh tur chuan 2022 an nghah leh phawt a ngai tawh dawn a ni.

US player zinga khawvel hriat hlawh zual Clint Dempsey, Michael Bradley leh Tim Howard te tan World Cup lehpek beisei chi a ni tawh lo. Chutihrualin Borussia Dortmund winger duhawm Christian Pulisic hoin World Cup lehpekah chuan kum dang zawng aia ṭha zawkin inlan an tum ang.