Federer-a'n Nadal a huphurh

Roger Federer chuan a vawi kua nan Wimbledon champion nih a tum tur thu a sawi a, chutih rualin a elpui Rafael Nadal chu a hlawhtlinna kawng dal thei tur a nih thu a sawi chhuak.

Mipa tennis thuneitu sang ber Association of Tennis Professionals-in ranking an tih chhuah thar berah Nadal-a'n point 8770 hmuin a chung berah a awm a, Swiss star Federer aiin point 50 chauhin a sang zawk a ni.

Player ropui pahnihte hi rinkai ni chungin Wimbledon-ah an inlan dawn, July 2 aṭanga khelh tur grass court inelna lian hi seeding siam la ni chiah lo mah se final hma chuan an intawn a rinawm loh.

Kum 36 mi Federer chuan, "Engtik lai pawhin Wimbledon khelh hi chu ka nghakhlel ṭhin, inbuatsaihna hnuhnung Halle Open-ah chak lo mah ila kuminah pawh phur leh tha tho takin ka inlan leh dawn a ni," tiin a sawi.

Grand Slam vawi 20 champion tawh Federer hian 2003 khan a vawi khat Wimbledon title a la a, major title hmasa ber a lak aṭangin All England Club-ah hian Nadal (2 titles), Novak Djokovic (3) leh Andy Murray (2) te lo chu midang champion thei an awm tawh lo.

Inelna tur thlir lawkin Federer chuan, "A nihna takah chuan Rafa hi champion tura rinkai a ni, ani hi a dam ṭha a nih phawt chuan a tan court chhungah tih theih loh khawpa harsa a awm lo," tiin Grand Slam vawi 17 champion tawh Nadal a fak thiam hle.