Russia-ah Samba Boys an lâm

Serbia striker Aleksandar Mitrovic-a'n, "Brazil hneh theih inring lo ni ila ka puanthuah telin ka haw tawh ang," tiin sawi mah se Brazil lakah meuh hnehna chang tur chuan an la ṭha tawk lo.

Samba Boys tia hminglem an pek Brazil hian Nilaini zan khan Serbia chu 2-0 in an hneh a, last 16 an lut - match hmasa bera Switzerland draw-tu Brazil-in match tinah hma an sawn a, champion rim an nam ṭan!

Brazil tan Paulinho leh Thiago Silva ten goal khat ve ve an khung a, Neymar leh Philippe Coutinho te an hmuhnawm ngaiin an hmuhnawm reng bawk - he team hian last 16-ah Mexico an hmachhawn dawn.

Group E inkhel dangah Switzerland chuan beisei tur nei tawh lo Costa Rica chu 2-2 a inhnehtawkpuiin last 16 an lut ve bawk.

Brazil an hmuhnawm
Tite-a'n a hman thiam sa player rual bawk a chhawr a, inkhel ṭantir aṭangin an hmuhnawm nghal. Mahse, minute 10-na lekah Marcelo chu hliam vangin lakchhuah a ngai a, Real Madrid defender thlak tur hian Filipe Luis luhtir a ni.

Brazil inkhel a buai phah lo, Serbia tlarhnung vawi tam an rum ṭhaih hnuah minute 36-na lekah goal hmahruai an khung. Coutinho thiam thil kan hmu a, Barcelona midfielder hian Catalan club tana a khelhpui Paulinho tan ṭha zetin a vawrh lut a, kum 29 mi midfielder hian ṭha zetin a pet lut.

Chawlhlawk hman a nih hnuah Serbia an hmuhnawm sawt a, thu ṭha an ngaithla tih a chiang. Aleksandar Mitrovic-a'n second half ṭan tir lam minute 15 chhungin chance ṭha vawi hnih ngawt a rawn nei hman a, Selecao fan-te thin thiin an awm bik lo.

Mahse, minute 68-naah team ṭha zawk danglamna bawk a lang nawn. Neymar-a corner pet chu vengtu nei lo Thiago Silva chuan ṭha zetin a tauh lut a, goal dang lut loin Brazil an chak.

Brazil leh Tite
Match hmasa bera Brazil-in Switzerland an inhnehtawkpui hnuah Costa Rica hneh turin injury time an nghah thlen a ngai a, sawisel an hlawh - a nihna takah chuan he Brazil team hi goal hmaah an vanduai a ni zawk.

Nilaini zanah erawh thawnthu ziah danglamin a awm ta a, Brazil-in an phu ang ngeiin hnehna an chang. Hetihrual hian 'pawp' lai awm lo tawp bik erawh a ni lo a, hetah tak hian fak phu chu Tite a ni.

Selecao boss hian World Cup khelh ṭan hma daih tawhin Russia-a a naute a rem dan tur a hrechiang tawh a, an hnufual laia substitution siam dan tur thlengin a bel tawh. Serbia lakah second half-ah an talbuai zauh a, midfield an thunun lo niin a lang.

Hei hi Tite-a'n hmu chatin Paulinho a la chhuak a, Fernandinho a luhtir. Manchester City midfielder luh hnuah an midfield-in ngai a awh a, Brazil an hmuhnawm chhunzawm. Neymar, Coutinho leh Jesus ten chance hlauhawm an nei deuh reng a, a tawpah chak phu zawkin hnehna an chang.

Beiseina thamral
Serbia coach Mladen Krstajic-a'n inkhelh ṭan hmain, "Theih loh a awm lo," ti mah se a nauten a beiseina an hlawhtlin tir thei lo a, first half-a an khelh chhiat piahlamah second half ṭantira an hun ṭha neih an chhawr lo kha an ui tawh ang.

Newcastle United aṭanga season hman zawh taka Fulham-a loan-a khelhtir Mitrovic-a'n chance duhawm a neihah an hun ṭha neih a hlawhltin tir thei lo. Brazil goalkeeper Alisson-a dan per a zawn taka tla chu tauh luhna remchang nei mah se goal line-a awm Silva a tauh per a, a hun neih dang Alisson hian a dan sak bawk.

Mitrovic-a'n an chance neih goal-ah a chantir lo a, Fernandinho luh hnua Brazil-in midfield an thunun hnuah Serbia-in ngai an awh leh tawh lo bawk. Serbia coach Krstajic chuan, "Minute 90 chhung ṭha taka i khel a nih loh chuan hrem i ni ṭhin.

"Brazil ang team ṭha laka khatiang game khelh kha chuan a harsa tawh ṭhin a ni. Tunah mai ni lo, World Cup ṭan hma aṭang tawhin Brazil hi last 16 lut tura rinkai an ni a, Germany an tlak tak bawk avangin an dinhmun a ṭha lehzual a ni," tiin an khingpui team a fak.