Chak zo lo mah se Switzerland an tlang

Switzerland-in Costa Rica lakah hnehna chang zo loin 2-2 in inhnehtawk mah se last 16 an lut tho a, quarterfinal luh inchuh turin Sweden an hmachhawn ang.

Costa Rica-in inkhel bul ṭan ṭha zawk mah se goal khung hmasa zawk erawh Switzerland an ni a, Blerim Dzemaili chuan minute 31-na lekah goal hmahruai a khung.

Chawlhlawk hman a nih hnua goal khung hmasa erawh Costa Rica an ni ve thung a, Kendall Waston chuan beisei tur nei tawh lo team tan hian minute 56-naah an si phurh sutna goal a khung.

Hun tawp nan minute hnih chiah a awm tawh tihah substitute Josip Drmic chuan Switzerland tan a khung leh a, Swiss team hi an chak dawn niin a lang hman.

Drmic-a goal khung hnu lawkah Costa Rica hi penalty pek an ni a, mahse video assistant referee (VAR) a inrawlh hnuah he penalty hi offside avangin sut a ni.

Injury time-ah Costa Rica-in penalty an hmu nawn - Bryan Ruiz-a'n post a pet per hnuah Switzerland goalkeeper Yann Sommer a per a, 2-2 a inkhel tawpin Costa Rica chu kut ruakin an haw ta bik lo.