European football aṭangin Milan hrem

AC Milan chu Financial Fair Play dan leh hrai an bawhchhiat avangin kum khat chhung atan European football khel thei lo tura hrem an ni. Italian club lian hian hrem an nihna chu infiamna lama thubuai ngaihtuahtu sang ber Court of Arbitration for Sport hnenah an khin let tur thu an sawi.

Season hmasa khan Milan hian Europa League an khel a, Serie A-ah parukna an nih bawk avangin season tharah European club inelna sang pahnihnaah hian inlan turin an tling. Mahse, hremna hi kaltlang pui a nih chuan an khel thei dawn lo tihna a ni.

Hrem chhan

AC Milan hi Italian prime minister Silvio Berlusconi-a'n 1986 aṭangin a thunun a, April 2017 khan Chinese sumdang hausa tawntaw hnenah £648m in a hralh.

Neitu thar thuneihna hnuaiah Milan hian season hmasa nipui lai khan player thar lakluh nan pound maktaduai 200 ngawt an seng a, an player lakluh zingah Juventus defender Leonardo Bonucci (£35.1m) leh FC Porto striker Andre Silva (£33.6m) te chu a langsar an ni.

UEFAFinancial Fair Play dan leh hrai ang chuan club-in a lakluh aia tam sum a hman chuan hrem theih a ni, tih a ni. Hei hi club hausa zawk ten player ṭha lei nan an duh ang tawk tawk sum an hman ngawt bik loh nana tih a ni.

Milan lam thu

Hrem an nihna khinlet an tum thu sawiin Milan chuan, "AC Milan chuan a dan hre mite chu hrema khinglet turin kan hriattir tawh. Chutih rualin kan hun hmasa lamah tihsual palh kan nei a nih chuan insiamṭha turin kan inpeih," tiin an sawi a, player an lei nasat chhan chu an tun hma lama an ropuina ang neih let an duh vang niin an sawi bawk.

Club hausa te hian an mahni duh ang ngawtin player ṭha zawng zawng an lakhawm vek thei bik lo a, an hmanral leh lakluh nen a inbuk tawk ve a ngai. Boruak ṭha lo a than mek laiin player nghet lo thawm a ri nghal a, khawthlang media-te chuan goalkeeper Gianluigi Donnarumma leh defender Leonardo Bonucci te chu chhuak tur angin an sawi leh der tawh.