Marouane Fellaini a cham dawn

Nipui bazar laia chhuak mai tur anga sawi Belgium midfielder Marouane Fellaini chuan Manchester United a chhuahsan dawn lo niin a lang, kum hnih daih contract a ziak leh dawn.

Kum 30 mi Fellaini hian Old Trafford-ah June 30 thleng daih bak contract a nei tawh lo a, contract hi an pawt sei lo a nih chuan a duh lam a hawi thei dawn a ni. United manager Jose Mourinho chuan chelh a duh thu a lo sawi tawh a, hun rei lote chhungin a dinhmun tur a chiang ang.

Sir Alex Ferguson thlaktu David Moyes khan Everton aṭangin Fellaini hi Man United-ah a lalut a, United tan hian match 156 a khelh aṭangin goal 20 a khung tawh. Tunah hian World Cup khela thang mek Belgium team-ah a awm a ni.