World Cup aṭanga tlak kan phu – Germany boss

FIFA World Cup hnuhnung pangaah champion lai ram paliin knockout stage an thleng zo lo. Chung ram palite chu France, Italy, Spain leh Germany te an ni a, vawi nga champion tawh Brazil chiahin champion anchhia hi an pumpelh thei a ni.

Anchhia dawng hnuhnung ber Germany coach Joachim Low chuan, "World Cup aṭanga tlak hi kan phu," tiin Russia ramah an khel ṭha tawk lo tih a pawm a, ṭawmpuitu an tam khawp ang.

Champion 2

Germany-in kum 2014 khan Brazil-ah Argentina hnehin an champion a, hemi ṭuma starting eleven te chu Manuel Neuer, tlarhnungah captain Philipp Lahm hoin Jerome Boateng, Mats Hummels leh Benedikt Howedes te an awm. Midfield-ah Bastian Schweinsteiger, Toni Kroos, Mesut Ozil leh Christoph Kramer te awmin Thomas Muller leh Miroslav Klose te an awm a. Bench aṭangin Mario Gotze, Per Mertesacker leh Andre Schurrle te an lut bawk.

Joachim Low-a ho bawkin Confederations Cup-ah nikum khan South American champion Chile hnehin an champion. Final-a inkhel bul ṭantute chu keeper Marc-Andre Ter Stegen, tlarhnungah Shkodran Mustafi, Jonas Hector, Anonio Rudiger leh Matthias Ginter te an awm a, midfield-ah captain Julian Draxler, Leon Goretzka, Lars Stindl, Joshua Kimmich leh Sebastian Rudy te awmin tlarhmaah Timo Werner a mal tlat a. Bench aṭangin Niklas Sule leh Emre Can te an lut bawk.

Germany boss Low-a'n Confederations Cup-ah player a enchhin tih phat rual a ni lo a, chutihrualin World Cup champion zinga player pakhatmah an tel loh avangin tun World Cup atan pawh thlan tur ṭhahnem tak a nei tih a lang nghal bawk.

Thlan sual leh buaina

Germany squad an puan hmaa mipui ngaihven chu keeper Manuel Neuer a ni a, Bayern Munich keeper hi inhliam vangin season tluan inlan lo ang hiala chhal theih a ni. Amaherawhchu, kum 32 mi Neuer hi best player ni lai a nih avangin a dam phawt chuan inkhel bul a ṭan tur thu a sawi chiang nghal a, Barcelona keeper leh Confederations Cup champion keeper Ter Stegen tan beisei a tawp nghal.

He thutlukna hian inhnialna siam mah se hei aia thutlukna sawi zui hlawh a awm a, Low-a'n winger Leroy Sane a thlang lo. Manchester City winger hian Euro 2016-ah beisei a phak loh bakah player enchhinna atana hman Confederations Cup-ah a hnar zai vangin a tel lo a, English club tana a khelh dan leh ram tana a khelh dan a inan ṭhin loh bawk avangin Low hian ṭan chhan ṭha a tak a neiah a ngaih theih.

Amaherawhchu, media ṭhatna ram England club-a khel Sane-a'n ṭantu a ngah a, ṭan chhan pawh an nei ṭha. German winger hian season liam ta khan PFA Young Player of the Year a dawn bakah goal 14 khungin assists vawi 19 zet a nei a, World Cup-a an mualpho leh takah chuan Low-a tan pawh insawifiah theih a ni tawh lo ang.

Low hian Sane chauh ni loin Argentina lama champion-na goal khungtu Gotze bakah Schurrle leh Liverpool midfielder Can te chu a thlang lo. Boruak ṭha lo belhchhah nan Ozil leh Ilkay Gundogan ten Turkey president Tayyip Erdogan nen thla lak puiin Germany Football Association bakah mipui thlengin ram hmangaihna tak tak nei lo tiin sawisel an hlawh bawk.

'Best' an ni lo

Germany-in World Cup atana an theme-ah 'best never rest' tih an hmang a, he thuziak hi an thawmhnaw ṭhenkhatah te pawh an nem kai mah se a tak takah chuan tun World Cup ṭan hma leh ṭan hnu hian Die Mannschaft hi team ṭha ber an ni lo.

Low-a hote hian kumin hian tun World Cup-a Sweden an hneh tih loh chu Saudi Arabia chiah an hneh a, heng inkhel pahnihah hian chak turin vanneihna an mamawh ve. Russia ramah Mexico hneh loin bul an ṭan a, South Korea hneh loin an khar. Kumin kumtir khan Spain nen an inhnehtawk a, hemi hnu Brazil leh Austria te an hneh lo.

Team an din hman lo

Low chuan friendly match-a beisei an phak loh hnuah World Cup-ah chuan an insiamṭhat hman tur a sawi mah se thu chu a tak ram a chantir thei lo. Mexico nen an inkhelh ṭumin Hector damlohna vangin a inlan thei lo a, Khedira leh Ozil ten beisei pha loin goal khungtu tur an nei lo bawk.

Sweden nen khelh dan phung thlakin Rudy-a'n tlarhnung pui ṭha mah se Bayern Munich midfielder hi inhliam vangin lakchhuah a ṭul a, Khedira leh Ozil te awm loin Germany khel a nung zawk hialah a ngaih theih a. Amaherawhchu an harsatna belhchhah turin Boateng chu hnawhchhuah a ni a, a tawpa an chakna chu vanneihna a ni.

Match thumnaah pawh Low-a thlan tur an inrinsiak a, an la ring sual zel. Mual sir aṭanga nawr thei tur Brandt leh tawnhriat nei ṭha Gomez ten bul an la ṭan thei lo a, World Cup hnuhnung pahniha goal 10 ngawt khung thei Muller chu bench-ah dahin Goretzka a rawn lang hlawl a. Knockout football-a pawimawh bera chhal theih tlarhnungah Boateng-a hrem a nih avangin mi thar Sule a rawn lang leh a, Germany coach Low hian 'best XI' a nei hman lo.

World Cup hmaa kum 2022 thleng cham tura contract ziak thar Low-a'n World Cup nomawi chawi puitute chungah rinna a nghat a, a player-te'n a rinna anga an khelh chhuah lehsi loh avangin September thla Peru nen friendly match an khelh hunah chuan squad an thlak danglam deuh a nih pawhin an mak lo ang.