France hmaah Argentina

World Cup 2018 last 16 chu zanin aṭangin khelh ṭan a ni dawn a, dar 7:30 hian Kazan Arena-ah France leh Argentina ten match hmasa ber an khel ang. Ram pahnih te hi player ṭha rual leh rinkai nichungin beisei an la phak rih lo. A chak lo zawk an tla nghal tawh dawn a, an squad en chuan tun World Cup match awm tawh zinga hmuhnawm ber khel chhuak thei tura theihna nei sang an ni.

Lionel Messi hming a langsar larh a, Argentina captain nena khaikhin chi em la ni lo mah se France hmatawng Kylian Mbappe leh Antoine Griezmann te hi champion pui tham an ni phak tho. Thiam leh thiam, cho leh cho–chungnung zawk nih inchuha an intawng tur hi engti zawng mahin sawi nep thei a ni lo ang.

Zin kawng inang lo
France hi Group C-ah awmin an match hmasa pahnihah Australia leh Peru an hneh a, match hnuhnung berah Denmark lakah goal khung lo mah se point sarih hmuin group hmahruaitu an ni tho. Argentina erawh Croatia lakah 3-0 ngawta an tlawm avangin tla thei dinhmunah an ding hman a, Nigeria 2-1 a an hneh hram avangin Group D-ah pahnihna an ni.

Ram pahnih hi tun hmain vawi 11 an intawng tawh a, South American ram hian record nei ṭha zawkin vawi ruk hnehna an chang. France lamin vawi hnih hnehna changin, ṭum thum dang chu an inhnehtawk. An inkhelh hmasak ber chu 1930 kha niin, an intawn hnuhnung pahnih (2007, 2009) khan La Albiceleste-in hnehna an chang a, an inkhelhna hmun hi Paris leh Marseille a ni.

Goal a ngai
Lionel Messi hattrick hmangin Argentina-in Russia panna tur ticket an nei a, Barcelona thiampuipa goal hmang bawkin World Cup last 16 an lut. World Cup-ah Messi a che ṭha tawk lo tiin sawi awm ṭhin mah se, Brazil-ah khan 'Best Player' a ni thei a, tuna an thlen chinah pawh a hnathawh sawi nep theih a ni lo.

Mahse, Messi sel tute hian ṭan chhan ṭha tak an nei. Argentina forward hian World Cup knock out stage chinah minute 666 khel tawh mah se goal a la khung miah lo! Chutihrualin he record hi France lam tan ngaihṭhat ngawtna chi a ni lo ang, Argentine player zingah Les Bleus laka goal khung thei hnuhnung ber chu Messi (2009) hi a ni.

Buaina a fel?
Hliam vangin Sergio Romero-a'n Russia a pan ve thei lo a, Chelsea keeper Willy Caballero-a'n goal veng mah se Croatia lakah a chesual. Jorge Sampaoli-a'n Nigeria lakah Franco Armani a ring zawk, River Plate si ban nghak hian ram tan a match hmasa ber a khelhah penalty chhuah mah se, hna dang a thawh ṭhat miau vangin France a hmachhawn leh zawk a rinawm.

Sevilla midfielder Ever Banega-a'n tun World Cup bika a vawi khat nan Nigeria lakah inkhel bul a ṭan a, midfielder ball thiam hian Messi tan ball ṭha bik a pe thei tih a lantir tawh, zaninah pawh tlarhma pui turin a tawlh hma ang.

Inkhel khaikhawm turin Javier Mascherano a pawimawh leh dawn a, Barcelona player hlui hian ball a pass thiam bakah a chhuhsak thiam hle. Chutihrualin tharum ngah Paul Pogba nena inel tur an nih avangin a hna a hautak dawn–tawnhriat a nei ṭha zawk tih erawh hriat tel a ṭha.

Messi kianga khel turin Gonzalo Higuain leh Sergio Aguero an inluh chhawk a, Juventus striker hian World Cup 2014 leh Copa America final-ah hun ṭha a hlah tawh a, an ramin nomawi an chawi lohna chhan pakhat a ni. Nigeria lakah pawh khung ngei tura ngaih a hlah leh tawh. France a hmachhawn a nih chuan Italian champion striker a nihna a lantir a ngai ang.

France an ṭha
Didier Deschamps-a'n an ram team a enkawl hnuah a match 80-na a tawng dawn, group stage lamah a naute a siksawi nasat avangin zaninah engtiangin nge a remkhawm ang tih chu hriatthiam harsa tak a ni. Bench-a ṭhu ṭhin ho pawh lut se awlsam taka nuai liam theih tur a ni lo.

Denmark an hmachhawn ṭum khan Steve Mandanda-a'n Hugo Lloris a thlak a; Djibril Sidibe leh Presnel Kimpembe te tlarhnungah awmin, Steven N’Zonzi chuan Paul Pogba hmun ruak a luah thung. Thomas Lemar leh Ousmane Dembele ten Blaise Matuidi leh Kylian Mbappe te hmun luahin; 4-4-2 formation hmangin an inrem. Tun World Cup qualifer leh inelna takah hian 4-4-2 leh 4-3-3 hi a hman thlak fo a ni.

Kum 49 mi Deschamps hian Euro 2016-ah pawh khan a naute a lo siksawi kual tawh ṭhin a, last 16-a Republic of Ireland nen an intawn ṭumin hun chanve hma lamah 1-0 in an hnufual. Mahse, Kingsley Coman la chhuakin Kante a dahlut a, Olivier Giroud hnungah chiah Antoine Griezmann a dah. Hun tawp lam minute 20 chhungin Griezmann-a'n goal hnih a khung a, Giroud-a'n assist a nei bawk.

Argentina lakah erawh an ṭhat dan berin an inrem nghal a ngai dawn. Deschamps-a'n Giroud leh Griezmann te tlarhmaah a dah leh ngei a rinawm, mual dinglam sirah ball thiam leh tlan chak Mbappe a awm ang. Paris Saint-Germain forward hian Peru lakah goal awmchhun a khung a, amah hi buaipui tham a tlin avangin player dangte tan hmunawl a siam thei–tlarhnung phuahchawp tak Argentina tan dan an awlsam lo mai thei.