Hockey World Cup khel tur Mizo nula Lalremsiami

July 21 aṭangin London, England-ah women's hockey World Cup khelh a ni dawn a, inelna hmachhawn tur India nula hockey khel thiam 18 an thlan chhuah zingah Mizo nula Lalremsiami a tel.

India hi Pool B-ah a thlengtu England (world number 2) bakah USA (7) leh Ireland (16) te nen an awmkhawm a, an elpui tur ram hi an ṭha hlawm hle. Kolasib chhul chhuak Siami hi tlarhmaah captain Rani Rampal bakah Vandana Katariya leh Navneet Kaur te nen koh an ni.

2017 Asian Championship-a India champion pui tawhtu Siami chuan, "Tun dinhmun ka thlen theihna chhan chu Pathian vang a ni a, chutih rualin coach te vang a ni bawk. A ṭul ang ang min buaipuitu Hockey Mizoram leh bulṭanna tur khelmual siamtu Sports Department leh SAI chungah kan lawm takzet," tiin Vanglaini a hrilh a, inelna lian hmachhawn a chak tawh thu a sawi tel bawk.

Siami hi kum naupangte nichungin India senior team-ah koh a ni chho deuh reng a, April thla a neih 2018 Commonwealth Games-ah pawh khan India team zinga naupang ber nichungin Australia-ah a lo feh chhuak tawh bawk a ni–ram tana koh a nihin player ṭangkai a ni phak deuh zel bawk.

India Team
Goalkeepers: Savita (Vice-Captain), Rajani Etimarpu
Defenders: Sunita Lakra, Deep Grace Ekka, Deepika,
Gurjit Kaur, Reena Khokhar
Midfielders: Namita Toppo, Lilima Minz, Monika, Neha Goyal, Navjot Kaur, Nikki Pradhan
Forwards: Rani (Captain), Vandana Katariya, Navneet Kaur, Lalremsiami, Udita.