Rooney-a’n US a pan

Everton striker Wayne Rooney chuan Major League Soccer club DC United tana khel turin USA lam a pan a, kum thum leh a chanve chhung atan contract a ziak.

Manchester United legend hian hetih hun chhung hian pound maktaduai 10 a hlawh dawn a, DC United player awm tawh zinga hlawh hnem ber a ni dawn tihna a ni.

Kum 32 mi striker chuan, “America leh MLS pan hi ka tan chuan chona phurawm tak a ni. He hmuna hlawhtlinna chhar tur hian ka tuihal a, team dang tana ka lo tih ṭhin tawh angin 100% ka pe dawn a ni,” a ti.

Rooney hian thla hmasa khan DC United hi a thu phungin zawm a lo remti tawh a, tunah chuan contract ziakin engkim a chiang ta a ni. English striker hian Premier League-ah hun a hman chhungin goal 208 a khung a, he inelnaa goal khung tam lamah Alan Shearer (260) chiah a tluk lo.