Ronaldo Vs Suarez & Cavani

European champion Portugal chu zanin dar 11:30 hian Fisht Stadium-ah South America ram zinga tawrhlelhawm ber zinga mi Uruguay nen FIFA World Cup last 16-ah an inhmachhawn dawn.

Khawvel player ṭha ber ang hiala chhhal ṭhin Cristiano Ronaldo chuan amah elpha zinga mi Luiz Suarez a hmachhawn dawn a, Barcelona striker kawppui hi PSG striker Edison Cavani a nih avangin Uruguay tlarhma hi an buk a rit zawkah a ngaih theih a. Chutihrualin khawvel hmuh châk Ronaldo vs Lionel Messi thleng tur chuan Portugal an chak a ngai a, Argentina-in France an hneh a ṭul bawk ang.

Tlarhnung a pawimawh

Goal khungtu lamin ngaihven an hlawh a, tlarhnung lam ngaihthah a thiang lo. Uruguay hian goal chhuah loin knockout stage an lut a, Celeste (Uruguay sawina) hian group stage-ah ṭum li 1930, 1950, 1954 leh 2010 ah te goal an chhuah lo a, heng inelna paliah hian semifinal an lut vek.

Uruguay match hmasa pahnihah Atletico Madrid player pahnih captain Diego Godín leh Jose Gimenez bakah Penarol right back Guillermo Varela leh Lazio wing back Martín Cáceres te an awm. Manchester United leh Eintracht Frankfurt tana khel tawh Varela ai hian Russia midfielder Denis Cheryshev-a'n an lama goal a khungna tura ball pettu Genoa player Diego Laxalt a lut thei. Keeper Fernando Muslera hi ram tan vawi 100 a inlan tawh bawk.

Portugal erawh an tlarhnung a phui tawk lo a, Spain lakah goal thum an chhuah. Morocco nen an inkhelh ṭumin keeper Rui Patricio-a'n chhanhim hramin goal an chhuah lo a, an tlarhnung erawh phui tih tur a ni lo. Iran nen pawh Portugal an talbuai a, chutihrualin an goal chhuah erawh penalty aṭanga lut a ni thung.

En bik turte chu

Portugal right back Cedric Soares chuan, "Uruguay-in player ṭha an nei a, keini chuan player ṭha ber kan nei," tiin chhuang takin Ronaldo an neih thu a sawi.

Real Madrid forward Cristiano Ronaldo hian match hmasa bera Spain nen hattrick a siam hnuah Morocco nen chakna goal khung leh mah se Iran nen penalty a hlah. Hei erawh hriat a ṭha, Ronaldo hian World Cup knockout stage chinah minute 424 chhung khel tawhin goal a la khung lo.

Uruguay forward Luis Suarez erawh Egypt nen reh deuh mah se Saudi Arabia lakah goal awmchhun a khung a, Russia an sawp ṭumin goal hmahruai a khung bawk. Barcelona forward hi tun hmain WC-ah a mualpho tawh a, kum 2010 khan semifinal an luh theih nan Ghana goal khung tur chu a kutin a dang a, kum 2014-ah Italy defender Giorgio Chiellini chu group match hnuhnung berah sehin a tel loin last 16-ah Colombia an hneh lo.

Uruguay hian last 16-ah Europe ram hi vawi khat chiah an la hmachhawn a, kum 1990 khan inelna thlengtu Italy chu 2-0 in an hneh lo. Hemi ṭuma Uruguay coach chu tun ṭuma Celeste boss Oscar Tabarez tho hi a ni a, Portugal coach Fernando Santos pawhin World Cup-ah tawnhriat nei ṭha tawhin hei hian inkhel hmuhnawmna a belhchhah ang.

Head to Head
Uruguay leh Portugal te hi inelna lianah an la inhmachhawn lo a, an intawn tawhna ṭum hnih pawh a rei tawh avangin zanin inkhel nena sawi zawm a rem lo. June 16, 1966 khan friendly match-ah inhmachhawnin mualneitu Portugal chu Jose Torres hattrick hmangin 3-0 in an chak. Ram pahnih hi Brazil-in an ram zalenna atana inelna an buatsaihah July 2, 1972 khan inhmachhawn lehin Uruguay leh Portugal te hi 1-1 in an inhnehtawk.