Thleng sang turin huai a ngai - Lovren

Croatia-in kumin World Cup-ah match thum khel tawhin an la chak vek a, Pathianni zan dar 11:30 hian Nizhny Novgorod Stadium-ah Denmark an hmachhawn dawn.

Zlatko Dalic hote hian group stage-ah Argentina 3-0 a an sawp avangin rinkai zingah an tel phak a, amaherawhchu World Cup an khelh hmasak bera pathumna an nih bak chhuan tham record an neih loh avangin huaisenna an mamawh.

Croatia defender Dejan Lovren chuan, "Kum 20 chhung chu World Cup-ah kan che ṭha thei tih hi ka ṭanna ni tawh ṭhin a, tun hi hun ṭha tak a ni. Kan huaisen a nih phawt chuan thui tak kan thleng a, chutihrualin vanneihna a neih a ṭul tel bawk," tiin a sawi a, team chhung boruak a ṭhat thu a sawi bawk.

Vatreni hian khawvel club ṭha pahnih Real Madrid leh Barcelona midfielder Luka Modric leh Ivan Rakitic te an kawl avangin game hmuhnawm an khel a, tlarhmaah Mario Mandžukic neiin an striker thlawp tur hian Ivan Perisic leh Ante Rebic te an nei bawk.

Denmark lamin Christian Eriksen an kawl a, Tottenham Hotspur midfielder hi danglamna thlen thei a ni. Age Hareide hote hian tun World Cup group stage-ah vawi khat chauh chak mah se hneh loh an la tawng lo.

Denmark boss Hareide chuan knockout stage chinah chuan khelh dan phung thar an neih tur thu an sawi a, an goal bawh a nat zawk tur thu a sawi lang.

Ram pahnih hi vawi ruk an inhmachhawnna tur a ni a, vawi hnih ve ve chakin vawi khat an inhnehtawk. Inelna lianah vawi khat chiah la intawngin Euro 1996 khan Croatia hi Davor Suker goal hnih leh Zvonimir Boban te goal hmangin 3-0 in an chak.