Khawtual tlangval hmachhawn tur Spain

Pathianni zan dar 7:30-ah World Cup champion tura beisei zinga mi Spain an inlan dawn a, inelna thlengtu Russia nen quarterfinal luh an inchuh dawn.

Team pahnih dinhmun a in ang lo –Spain hi inelna ṭan hmaa champion tura beisei, match hmasa ber khelh hma ni hniha coach Julen Lopetegui ban vanga 'dinhmun' hniama ngaih an ni.

Russia erawh inelna thlengtu nichungin an lakah beiseina a sang lo–mahse an match hmasa berah 5-0 a Saudi Arabia an sawp hnuin Egypt chu 3-1 in an sawp leh a, last 16 an lut.

Spain-in harsa tak chungin last 16 an lut a, Russia erawhin an match tawp bera Uruguay (3-0) an ngam loh hmain knockout round an lut dawn tih a chiang tawh.

Player 'hero' Hierro

Fernando Hierro-a'n Spain a enkawl dawn tih a chian khan an match hmasa ber khelh nan ni hnih chiah a awm tawh a, Spain captain hlui lakah beiseina sang tak neih a harsa hle–an match hmasa berah Portugal (3-3) an draw a, harsa taka Iran (1-0) an hneh hnuah Morocco (2-2) an inhnehtawkpui bawk.

La Roja hian group hmahruaitu nichungin last 16 lut mah se Portugal tih loh Iran leh Morocco hi team ṭha huang chhunga dah an ni lo a, an khelh dan avangin Hierro-a'n sawiselna a tawk.

Real Madrid coach hlui Bernd Schuster chuan, "Spain buaina chu Hierro a ni. Player nih leh coach nih hi a in ang lo," a ti a, World Cup meuha Spain kaihruai turin a la nau deuhah a ngai.

Mahse, Dani Carvajal chuan an coach hi chhanin, "Schuster thusawi hi ka

ṭawmpui lo. Nitin a coaching chhim a, a thusawi ngaithlatu chu keimahni kan ni a, kan hrechiang ber. Coach ṭha tak a ni a, thih thlengin a lam kan ṭang ang," a ti.

Iniesta a tar lo

Spain beisei phak loh chhana puh zingah Andres Iniesta chu hming langsar a ni a, Barcelona legend hi starting XI aṭanga paih chhuak tura nawrna a tam hle–heng mite ṭan chhan chu 'Iniesta a tar tawh' tih a ni.

Kum 34 mi midfielder chuan amah sawiseltute chhangletin, "Kum 30 ka tlin hnuah hian ka tar tawh nia sawina ka tawk nasa hle. Mi thusawi a dik loh thu sawi turin engmah ka ni lo a, an ngaihdan chu an sawi thiang alawm.

"Mahse, miin ka chungchang thu an sawi avang maiin ka buai lo a, ka theihna zawng zawng pea a ṭha thei ang bera khelhchhuah hi ka tum ber chu a ni," a ti a, Russia lakah khel ṭha turin beisei a ni ang.

Spain coach Hierro-a'n Russia lakah player a thlak danglam dawn nia sawi a awm a, Portugal laka bul a ṭan hnua bench lama hun la hmang Koke chuan inkhel bul a ṭan beisei a ni a, Marco Asensio hming sawi rik a awm bawk.

Nghilh har Hierro

Russia coach Stanislav Cherchesov hi player a nih laia goalkeeper ni ṭhin a ni a, ram tan pawh vawi 39 ngawt a inlan hman. Kum 54 mi manager hian player a nih laiin a hunlaia Real Madrid defender Hierro a hmachhawn tawh.

Cherchesov chuan, "Hierro hi player a nih laiin ka hmachhawn tawh a, ka la hre reng a ni. Santiago Bernabeu-ah inkhel tura kan kal ṭumin kan intawng a, a shot kawh zet ka dang a, kan chak nghe nghe," a ti!

Tunah chuan player anga lo intawng tawh pahnih kha coach angin World Cup-ah an intawng tawh dawn. Cherchesov-a'n si ban mai nghak tawh loin Russia zahawmna humhim tumin a ding ang a, Hierro-a'n Spain ropuina nei let turin a naute goal net a zawn tir thung ang.

Russia mipui ten Spain an hmachhawn hmain chanchin lawmawm an nei a, an player inhliam pahnih Alan Dzagoev leh Aleksandr Erokhin an dam tawh a, squad-ah player inhliam kawl an nei lo–Spain hmachhawn turin an dam vek.

Thawnthu thar?

Spain midfielder Andres Iniesta-a'n kum 12 liam ta khan Russia lakah ram tana a match hmasa ber a khel a, May 27, 2006-a an intawn ṭum khan 0-0 in an inhnehtawk.

Japanese club Vissel Kobe midfielder hian World Cup zawhah chuan international match a chawlhsan tawh dawn niin an sawi–Pathianni zanah an chak lo a nih chuan a bul ṭanna team hi a tawpna a ni thei a, hei hi thlentir a duh lo ang.

Hetihlai hian Russia team hi an taksa leh rilruah Spain hmachhawn turin an inpeih tawh hle niin an fitness coach Paulino Granero chuan a sawi–Granero hi Spanish a ni!

Granero chuan, "Ka rilru hi Russian a ni tawh," tiin an ram team aia a hnathawhna team a dah pawimawh zawk thu a sawi a, "Player-te an in fit ṭha a, an taksa dinhmun pawh duhthusam a ni," tiin Spain tawng tura an team inpeih thu a sawi.