Final-ah Chawnpui Vs Ramthar

MBBA hriatpui inelna Chawnpui Inter Branch YMA Basketball Tournament final chu zanin dar 8:00 hian Chawnpui Sports Centre-ah inelna thlengtu Chawnpui leh Ramthar ten an khel ang.

Ramthar hian final thleng turin Ningani zan khan Khatla South 91-89 in an hneh a, inkhel hmuhnawm tak niin sawizui a hlawh bawk. Khatla South hian hun tawp lamah a zawnin 3-points vawi hnih an lut a, an lehthal chiah. Amaherawhchu referee-in inkhel a kalpui leh tawh hnuah inkhel titawpin replay an en let a, Khatla South chu point thum paih sak an ni a, Ramtharin chak nan an hmang bawk.

Semifinal hnuhnung zawkah Republic Vengin bul an ṭan a, point 20 chuangin hma hruai chho nghalin Chawnpui an mangang a, mipui lam pawhin thawm neih an harsat. Hun tawpah inpuahchahna nei ṭha Chawnpui an harh chhuak a, mipui leh vanneihna nen ṭangkawpin Republic Veng 63-60 in an lehthal.

Finalist team pahnih hi semifinal-ah chak tura rinkai an ni ve ve a, an chak dan awlsam lo mah se an thiam tih hai rual a ni lo. Chawnpuiin semifinal-ah ṭantu an neih ṭhat zia an lantir tawh a, Ramthar tan nomawi chawi turin veng mipui nen an thawhchhuah a ṭul ang.