England tlawmna an tan beiseina!

Ningani zanah England leh Belgium ten group stage match hnuhnung ber an khel a, team pahnihin an player chhawr rim rual an chawlhtir zanah Belgium hi 1-0 in an chak.

Adnan Januzaj chuan mi­nute 51-naah goal chung kil sirah mawi zetin a thlawh lut a, Red Devils chakpui nan a tawk - Manchester United a hlawhchham, hmanni lawka an sawi vul chuk player hian theihna a la nei reng tih a pholang.

Three Lions-in hnehna chang zo lo mah se an chak hi an tan malsawmna a ni thei - group-ah pahnihna an nih avangin last 16-ah Colombia an tum dawn a, South American team hi an hneh thei a nih chuan Sweden leh Switzerland inkhela chak zawk quarterfinal-ah an hmachhawn ang.

Inthlak danglamna

Team pahnih intawn hmain last 16-ah an dinhmun a chiang tawh a, inkhel boruak sang tak a nih a rinawm loh sa. Hei mai hi a ni lo, coach pahnihin khelmuala hun hmang tam lo an player te an chhawr tur thu an sawi chiang.

Belgium coach Roberto Martinez-a'n inkhelh hmain, "Hnehna chan hi kan thupui ber tur a ni lo ang," tiin England nena an intawn hmain a sawi tawh a, khelmuala inlan tam lo zawk a player-te chhawr a tum thu a sawi.

Everton boss hlui hi a thu­sawiah a ding nghet a, starting XI-ah Romelu Lukaku, Eden Hazard, Kevin de Bruyne, Toby Alderweireld, Jan Vertonghen, Axel Witsel leh Dries Mertens te hmel hmuh tur a awm lo.

England coach Gareth South­gate pawhin a sawi lawk ang ngeiin player a siksawi a, Panama laka inkhel bul ṭan aṭangin player pariat ngawt a thlak danglam a, bul ṭan tura beisei Harry Kane meuh pawh bench lamah dah a ni.

Inkhel mutthlu!

Team pahnihin an starting XI pangngai an chhawr loh avangin beisei angin inkhel a hmuhnawm tawk lo a, last 16 lut chiang tawh an nih bawk avangin team pahnih player zingah chak duhna a awm tawk lo niin a lang.

First half-ah inkhel hmuh­nawm lo tak an pholan hnuin second half-ah goal kan hmu a, Januzaj chuan minute 51-naah goal a khung - ram tan match kua a inlan hnua a goal khung vawi khatna a ni a, a theihnghilh tawh lo ang.

Harry Kane tel loa khel England an hlauhawm hleithei lo a, an chance neih ṭhatah Marcus Rashford chuan goal-ah a chantir thei lo bawk - Manchester United forward hian Thibaut Courtois chauh a hmachhawn hnuah goal a khung thei lo.

Captain armband nena in­lantir Eric Dier-a'n beisei a phak lo a, a khelh dan aṭanga thlir chuan Jordan Henderson dinhmun a derthawng rih dawn lo niin a lang. Jamie Vardy leh Rashford pawh Raheem Sterling dinhmun him zia pholangtu mai an ni a, Gary Cahill, Danny Rose leh Trent Alexander-Arnold ten mamawh hunah chuan innghahna tlak an ni tih an pholang thung.

Three Lions inzirna

England manager Gareth Southgate chuan, "Kan tan chuan inzirna ṭha tak a ni a, inthlak danglamna awm nual mah se kan match hmasa pahnih ai chuan a harsa zawk dawn tih kan hre lawk a ni.

"Thil tam tak kan zir chhuak a, nakinah uluk taka thlirletin kan zirchiang leh ang. Belgium khan ball an chan tam zawk avangin nawr kan harsat a, chance kan neih zat erawh a intluk viau a ni," a ti.

Belgium coach Roberto Martinez chuan, "Belgium mipuite chuan he team hi chhuang takin an thlir ang tih ka ring tlat a ni. Player zawng zawngin khelmuala inlan an duh a, kan hmaa ding apiang hmachhawn turin kan inpeih a ni," tiin a sawi.