Mizoram bul ṭanna tur Tripura
Santosh Trophy qualifying round chu November 28, Pathianni aṭangin khelh ṭan a ni dawn a, tlai dar 2:30-ah Mizoramin an match hmasa berah Tripura an hmachhawn ang. Group B inkhel dangah inelna thlengtu Manipur leh Nagaland te chawhma dar 9:30-ah an inkhel ang a, group khat aṭangin team khat chauhin final round an lut ang.
NorthEast state pasarihte hi group hnihah ṭhen hran an ni a, group A-ah Meghalaya, Arunachal Pradesh leh Assam te awmin inelna hi Shillong-ah a neih a ni thung. November 28 tlai dar 2:30 hian Assam leh Meghalaya te an inkhel dawn a, team ṭha pahniha ngaih match hmasa bera an inkhelh dawn avangin inkhel a pawimawh nghal hle.
Mizoram 'thar'
Mizoram squad-ah senior team-a tel tawh pariat an awm a, keeper pahnih F. Lalmuanawma leh Malsawmdawngliana bakah captain Lalrinchhana Tochhawng, Lalmawizuala, David Lalchhuanawma, Lalsawmzela, K.C. Larchhuakmawia leh Vanlalthanga te chauh an awm.
Keeper Muanawma leh Rinchhana te tun hmain hmun pawimawh an chang tawh ṭhin a, player dang zawng chu squad tikimtu an ni ṭhin zawk. Tun ṭumah erawh Mizoram senior team-a tel tawh hrim hrim hi chu tawnhriat nei ṭha tiha sawi theih an ni tawh ang.
Chutihrualin player-te hi Mizoram junior team tana khel tawh leh nomawi hial chawi tawhte an ni hlawm a, MPL-a inchher hriam tawhte an nih hlawm avangin tawnhriat nei lo tawp chu a ni lo.
AIFF Elite Academy-a awm tawh leh ISL reserve vela tawnhriat nei tawh Lalnun-tluanga Bawitlung, Lalengzama Vangchhia, Eric Remruatpuia Chhangte leh Lalrinzuala te an awm a, hmabak nei êng midfielder K. Lalrinfela'n ten senior player hmunruak an hnawh khah a ṭul ang.
A harsa dawn
Team pali aṭangin team khat chauh tlang tur an nih avangin a harsa dawn a, Mizoram team an danglam ang bawkin state dang team-te hi an danglam theih avangin final round khelh phak hi hlawhtlinna a ni thei ang.
Kum 2019-a qualifying khelh a nih hnuhnun ber khan Tripura-in inelna an thleng a, Mizoramin inelna thlengtu hi 2-1 in an hneh hram. Tripura-in Mizoram lamah goal an khung hmasa zawk a, hei bakah hian team dang pahnih Arunachal Pradesh leh Assam te an hneh ve ve avangin dah hniam ngawt a thiang lo.
Chutihrualin team khat chauh a nih avangin Manipur hi Mizoram elpui ber turah a ngaih theih a, inelna thlengtu an nih bawk avangin khelh an harsa dawn. Manipur hian Santosh Trophy atan inbuatsaihna ṭha an nei thei a, I League club Trau leh Neroca te nen practice match an neih theih bawk avangin inelna hmachhawn turin an inpeih.
Nagaland hi dah hniam theih an ni lo a, tun hnaiah nasa takin hma an sawn. January 2020-a Dr TAo Football an thlen ṭum pawh khan group stage-ah Manipur an pet tla a, semifinal-ah champion zui ta Mizoram hneh lo mah se an chak lohna hi 2-1 chauh a ni.
Group B - Fixtures
November 28, Pathianni
Manipur 9:30 AM Nagaland
Mizoram 2:30 PM Tripura
November 30, Thawhlehni
Manipur 9:30 AM Tripura
Nagaland 2:30 PM Mizoram
December 2, Ningani
Tripura 9:30 AM Nagaland
Manipur 2:30 PM Mizoram