NT-a inlan hun a thleng ta

Mizo boxer langsar bera chhal ngam NT Lalbiakkima chuan Mizoram leilungah a vawi khat nan ring chhung a rap dawn ta a, zanin dar 8:00 hian LPS Fight Night 2-ah IBA intercontinental title a kawl lai chu humhim a tum dawn.

Siaha boxer hmaa ding turin Thai boxer Gerttipong Kumsahwat pawhin a coach nen Aizawl leilung an rawn rap tawh a, Dawrpui Multipurpose Hall-ah boruak a 'hot' loh ring suh.

Fight Night-ah hian Mizo boxer dang paruk an inlan dawn bawk a, inhnekte hi LPS pawt tan cable operator-te hnenah Rs.60 pein a en theih dawn a, LPS pawt lo leh Mizoram pawn lama awmte tan Chhimbal app-ah Rs.100 chawiin a en theih thung.

Zo Keite
Amah ṭantuten 'Zo Keite' tia hming lem an pek NT-a hian fight hmachhawn tura a inpeih tawh thu vawi tam a sawi a, WBO Asia-Pacific title fight tawh Kumsahwat hi zuam sual theih a ni tih hre mah se hneh ngei a inring.

NT-a chuan, "Hna harsa a awm lo ang. Chetsual theih a ni tih chu ka hria a, mahse, tun hi ka ṭhatlai ber a nih avangin boxer dang tan hneh chi ka ni lo. Hma takah engkim chinfel ka tum ang," tiin Vanglaini a hrilh.

Siaha boxer hian dollar 1,500 (Rs. 1,11,576.45) a hlawh dawn. Mizo boxer inlan tur pasarihten Chhimbal aṭanga sum hmuh 85% an chang dawn bawk a, heta ṭang hian NT-a pawhin share a nei ve leh bawk ang.

Dev-a beiseina
NT-a manager, Marine Pro Boxing Promotions neitu ni bawk Devraj Das chuan zanina NT-a inhnek tur chu professional boxing a luhchilh hnua fiahna hautak ber ni tura a ngaih thu a sawi.

Dev chuan, "Kum 2018-a Hasanboy a hneh hnuah khan NT-a tan chuan tun hi boxing ring a luh hnua hna hautak ber tur a ni dawn a, ka en châk tawh a ni," tiin Vanglaini a hrilh.

NT-a hian June 2018 khan khatihlaia world number 1 leh Olympic champion Hasanboy Dusmatov chu a lo hneh tawh a, Indian boxer zinga Olympic champion lai hneh thei hmasa ber a ni.

NT-a te inhnek hi hahdam deuha en kan inring a, chumi atan chuan training pawh kan bei ngawrh. First round-ah em chuan a knockout ang tiin ka sawi ngam lo a, mahse, round nga hi chu kan pelh ka la ring lo fan e.
- Lalmuanpuia, NT-a coach

NT-a inenkawlna hi uluk takin kan kalpui a, ka lawmna em em chu a rihna kan tihniam viau chunga a chakna leh a tharum a hloh miah lo hi a ni a, a hnek nat ngaiin a hnek na reng.
- Biakzuala Khenglawt, NT-a strength & conditioning coach