Mizoram hmeichhe team khingpui tur Kerala

Senior Women's National Football Championship-ah Mizoram team chuan November 28, Pathianni tlai dar 2:30 hian an match hmasa berah inelna thlengtu Kerala an hmachhawn dawn.

Inelnaah hian team 32 an awm a, group pariatah ṭhendarh niin group khat aṭangin pakhat chauh an tling dawn. Mizoram awmnaah Kerala bakah team ṭha Madhya Pradesh leh Uttarakhand te an awm bawk avangin quarterfinal thlen hi a harsa dawn.

Mizoram team hi coach Lalrozara leh assistant coach H. Lalrindika ten an enkawl. Rozara chuan, "Pakhat chauh an tling dawn a, Kerala hi hneh ngei a ṭul. Ṭan phat aṭangin attacking football kan khel nghal ang," tiin Vanglaini a hrilh.