Chelsea hmaah Carrick-a 'Man United' fiahna

Manchester United chu November 28, Pathianni zan dar 10:00 hian Stamford Bridge-ah an lenglut dawn a, Spain rama Villarreal hneh zo hlim Michael Carrick leh a hote tan fiahna hautak a ni dawn.

Tun dinhmunah Thomas Tuchel kaihhruai Chelsea hi Europe-a team ṭha ber zinga mi an ni a, Premier League hmahruaitu an nih bakah Juventus 4-0 in an sawp zo chiah. Man United erawhin league match hnuhnung berah Watford an hneh lo a, captain Harry Maguire hrem vangin an khel thei dawn lo bawk.

Carrick-a 'United'
Ole Gunnar Solskjaer an ban tak avangin assistant coach Carrick-a'n mawhphurhna a la a, Yellow Submarine lakah danglamna tlem hmuh tur a awm.

Tlarhma lamah nipui lama manto taka an lakluh Jadon Sancho a che ṭha a, English winger vang hian Man United inkhel a hmuhnawm sawt. Chutihrualin Man United player-ten inrintawkna an ngah lo a, Chelsea an hmachhawn dawn bawk avangin goal venhim hna an thawk ang.

Captain Maguire hrem a nih bakah Raphael Varane inhliam vangin a la khel thei lo a, Victor Lindelof kawppui turin Eric Bailly leh Phil Jones te thlan theih an ni dawn. Chutihrualin defender pathum chhawr a tum a nih chuan Lindelof, Bailly leh Luke Shaw te an awm thei bawk a, English left back hi a dinhmun enfiah a la ngai thung.

Carrick-a'n defender pali emaw panga emaw pawh hmang se goal venhim a ngai pawimawh hmasa dawn a, Liverpool leh Watford laka mualpho taka chak loh an duh dawn lo. Hemi a nih avang hian midfield-ah tlarhnung pui turin Scott McTominay leh Fred te an awm thei dawn a, Villarreal laka khel ṭha Bruno Fernandes leh Marcus Rashford te bul ṭan turin an inpeih bawk ang.

Chelsea ve thung
Chelsea-in Juventus sawp mah se lawm a kim lo. Wing back che ṭha Ben Chilwell a inhliam a, a chawl rei dawn. English defender bakah hian midfielder ṭha mi N'Golo Kante chu hliam vangin thlak a ngai bawk.

Chilwell leh Kante bakah Kai Havertz leh Mateo Kovacic te hliam vangin an inlan lo thei bawk. Thomas Tuchel-a'n team a siksawi hret a ṭul dawn a, German manager hi a thiam thil pholang tura ngaih a ni. A êng zawnga thlir chuan Romelu Lukaku leh Timo Werner te chhawr theihin an awm tawh a, an muala khel tur an nih bawk avangin chak ngei tura ngaih an ni.