Djokovic a inlan lo phal lo ang - Australian Open tournament director

Australian Open atana tournament director Craig Tiley chuan nakkuma inelna an buatsaih tur chungchang a sawi a, champion lai Novak Djokovic chu a nomawi humhim tura a inlan ngei a beisei thu a sawi.

Hripui laka invenna la lo tan Australian Open hi khelh theih a ni dawn lo, zin luh ringawt pawh thil harsa a ni dawn. Tun dinhmunah chuan world number 1 Djokovic hi vaccine la duh lo zinga mi a ni a, inelna a hmachhawn thei dawn em, tih a la chiang lo.

Craig Tiley chuan, "Novak hian a hun ṭha a bawhpelh duh ka ring lo," a ti. Tiley hian Djokovic chuan Roger Federer leh Rafael Nadal te chu Grand Slam nomawi chawi hnem lamah khum ngei a duh a ring tlat a ni.

Tun dinhmunah tennis professional player zinga 85% chuan vaccine an la tawh, ruahmanna ang chuan Australian Open an khelh meuh chuan 90-95% chuan vaccine an la tawh ang, mahse tuna la la ve lote hi chu invenna lak duh lote an ni tawh hlawm.

Tennis Australia chuan major tournament an thlen tur atan inbuatsaihna a ṭhat tur thu an sawi. January thlatir lam hian Australia ram chhung hmun 17 zetah hard court inelna buatsaih an tum.