Man United-in Rangnick an hmin

Manchester United-in Ole Gunnar Solskjaer thlak nan Ralf Rangnick an lalut dawn a, German manager hi work permit a la fel hman loh avangin Chelsea nen an inkhel a enkawl hman dawn lo.

Kum 63 mi Rangnick hian season khelh hmabak a enkawl ang a, season hnih dang thurawn petu zingah a tel leh dawn. Man United-in season laihawla football khawvela sulhnu nei ṭha tak an chang thei hi an vannei hle.

Rangnick hi German football-a hming langsar ber zinga mi a ni a; Stuttgart, Hannover, Hoffenheim, Schalke leh RB Leipzig-ah sulhnu ṭha tak a hnutchhiah tawh.

Chelsea pawhin manager lailawk atan Rangnick hi an sawm a, a hnawl. German manager-in Chelsea a hnawl laia Man United a thlan chhan nia ngaih theih chu season khelh hmabak a la pawimawh bakah kum hnih chhung a thurawn an la zui dawn.

Mizoramah pawh coaching rawn pe tawh Lutz Pfannenstiel chuan, "Kum 15-20 chhunga Germany-in coach a chher chhuah ṭha ber zinga mi a ni. A hnathawh tawh chinah a hlawh tling a, England-a hnathawh hun ṭha hi a hlah duh lo. Man United hian manager lak theih zinga ṭha ber an la a ni," tiin a sawi. Pfannenstiel hian St. Louis SC sporting director hna a chelh mek.

German manager Rangnick hian kum 2011 khan DFB Pokal-ah Schalke a champion pui a, a career-ah nomawi chhuan tham nei lo mah se a football khelh dan hmang avangin fak a hlawh. Jurgen Klopp-a larpui gegenpressing hi Rangnick a hmuhchhuaha ngaih a ni a, German manager ṭha dang Thomas Tuchel, Julian Nagelsmann leh Ralph Hasenhuttl te pawhin a hnen aṭang hian thil ṭhahnem tak an zira ngaih a ni bawk.